Besservisseravísur

Ég er búinn að gúggla

gramsa og pæla

Ég veit hvað er rétt 

og ég veit hvað er þvæla

Fólkið er fífl

það hver maður sér

því mannskrípin eru 

ekki sammála mér

Milljónir kusu 

manngreyjið Trump

Moðhausar mærast 

þann peningastrump

Að aðhyllast hann

sem mér finnst ei rétt

eru öfgar sem ég 

geri að forsíðufrétt

Internetið er kastalinn minn

Minn réttarsalur 

og rafmagnsstóllinn

Ég lít yfir lýðinn 

sem lúta skal mér

og leita að þeim 

sem ei sammælast mér

Hver trúir á himnavist

helvíti og engla?

Í vitsmunastöðvarnar 

vantar víst tengla

Fólk trúir að Guð 

hafi galdrað fram sál

geðveikt það vitnar 

í Pétur og Pál

Klókur ég er 

og kann æði mikið

Kokhraustur held ég 

um kennaraprikið

Auðmýktin ætluð er 

auðtrúa greyjum

Þá aumingja árétta 

með fussum og sveijum

Innfluttan múslima 

hræðist þá annar

og óttast hið versta 

ef gerast þeir grannar

Heimskinginn hryðjuverk 

tengir við trú

í hálfvitahætti hans 

finnst ei heil brú

Af tungu minni 

tær viskan drýpur

Tigna skal þann 

sem trúr hana sýpur

Ég þoli það fólk 

sem þekkist mín mið

en þöngulhausum 

ég gef engan grið

Ég skipti mér af 

ef skoðanir skarast

Orðaskambyssu  mína 

skalt varast

Ef eigi í málefnum

meðvirkist mér

Þá markvisst ég gera 

mun lítið úr þér

Ég auðvitað hef 

alltaf rétt fyrir mér

Allt svo augljóst 

í kollinum er

Ei þarf ég annað 

en mitt sjónarhorn

Öndverð meiði 

eru fáheyrð og forn

Ég er búinn að gúggla

gramsa og pæla

Ég veit hvað er rétt 

og ég veit hvað er þvæla

Fólk er fífl

það hver maður sér

því mannskrípin eru 

ekki sammála mér

Sumir leyfa sér að kalla aðra vitleysinga, fávita, fífl eða öðrum niðrandi nöfnum opinberlega. Ég heyrði stjórnmálamann úr röðum Pírata gera slíkt í Kryddsíldinni um daginn, um leið og hann fullyrti að ALLIR væru sammála honum. 

Samskiptakerfi og fjölmiðlar minna oft á skotgryfjur þar sem skotið er úr leyni á venjulegt fólk sem leyfir sér að viðra skoðanir sínar. Ekki er látið nægja að gagnrýna hegðun eða skoðanir málefnalega. Það þarf að ráðast að persónunni líka og gera lítið úr henni. 

Að nota liggjandi mann sem stall til að lyfta sjálfum sér upp er að mínu mati ekki virðingarvert. Manneskja sú er jafn lítil þótt foróttar iljar hennar hvíli á andliti annarar manneskju sem búið er að skella í skítinn. 

„Fjölbreytileiki“ er orð sem forsetinn notaði í ávarpi sínu til að vísa í framtíð þar sem manneskjur bera virðingu hvor fyrir annari, þrátt fyrir mismunandi lífsviðhorf.

Þannig 2017 vill ég....

...en kannski ekki besservisserarnir.