Rútan sem fór út af Þingvallavegi var á sumardekkjum

Samkvæmt heimildum fréttastofu var rútan sem fór út af Þingvallavegi í morgun á lítið slitnum sumardekkjum en hálka var á veginum. Rútan var á vegum hópbílafyrirtækisins Skagaverks en Gunnar Þór Gunnarsson, forsvarsmaður fyrirtækisins, sagði í samtali við Vísi fyrr í dag að rútan hafi verið á góðum dekkjum en þó hafi ekki verið um nagladekk að ræða.

Alls voru 42 farþegar í rútunni sem fór út af Þingvallavegi við Skálafellsafleggjara rétt upp úr klukkan 10 í morgun. Flestir ferðamennirnir í rútunni voru kínverskir en ökumaður og leiðsögumaður voru íslenskir. Alls voru sautján farþegar fluttir á Landspítalann en af þeim eru tveir á gjörgæslu.

Aðrir farþegar voru fluttir í fjöldahjálparstöð Rauða krossins í Mosfellsbæ en einhverjir þeirra sem voru með minniháttar meiðsl fengu aðhlynningu á heilsugæslunni í Mosfellsbæ. 

Þingvallaveg var lokað í um fimm tíma vegna slyssins en búið er að opna veginn, samkvæmt upplýsingum frá lögreglunni.

Alls hafa þrír hópferðabílar farið út af vegum á Suðurlandi í dag vegna hálku og erfiðra aðstæðna.