Kraumandi kergja vegna KúKú Campers

Óhætt er að segja að kraumandi kergja vegna ferðaþjónustunnar Kúkú Campers hafi brotist út í kjölfar fréttar Vísis um stóðlífi í Seljavallalaug. Þar kom meðal annars fram að þeir hjá Kúkú Campers eru afar brattir í markaðsstarfi sínu og senda meðal annars þau skilaboð til sinna umbjóðenda að gráupplagt sé, vegna strjálbýlis, að kasta klæðum um allar koppagrundir og hefja ástarleiki. Seljavallalaug hefur þótt upplagður vettvangur fyrir slíkar æfingar. Fyrirtækið er harðlega gagnrýnt í Facebook-hópi sem kallast Bakland ferðaþjónustunnar.

En, þó frjálsleg skilaboð um kynlífsparadísina Ísland hafi farið fyrir brjóstið á mörgum eru ýmis önnur skilaboð sem þykja misvísandi. Karl Lúðvíksson, leiðsögumaður í Langá og veiðiskríbent Vísis, bendir á það að í fyrra hafi hann í fjórgang þurft að beina fólki á vegum Kúkú Campers frá Langá, en það mætti með veiðistöng sína og vildi veiða sér í soðið. Karl segir Kúkú Campers-menn verði hreinlega að skoða hvaða vitleysu þeir eru að senda skjólstæðingum sínum.

Karl vísar til skilaboða þar sem sagt er að íslensk lög heimili hverjum sem er að borða hvað sem er hvar sem er. „As a mesure to keep travelers alive in Iceland, there is a law here that allows anyone to eat anything of anyone’s property. You can´t take anything with you from another bloke’s land but you can eat as you want for 24 hours.“

Karl segist þekkja fjölmörg dæmi önnur um það að ferðalangar á vegum Kúkú Campers hafi ekki virt neitt sem heita veiðileyfi og farið um og viljað veiða. Á vegg Karls segist Halldór Gunnarsson, fyrir veiðistaðavefsins veidistadir.is hafa sent inn kvörtun til Ferðamálastofu vegna slíks.

Samkvæmt upplýsingum frá Ferðamálastofu fengu Kúkú Campers ferðaskipuleggjandaleyfi frá Ferðamálastofu í apríl 2012. Leyfið felur það í sér að þeim er leyfilegt að skipuleggja ferðir um landið. Vísi tókst ekki að ná tali af eigendum Kúkú Campers, þeim Steinarri Lár og Lárusi Guðbjartssyni, en var tjáð af starfsmanni fyrirtækisins, sem er með höfuðstöðvar í Hafnarfirði, að þeir væru væntanlegir uppúr hádegi.

Vísir ræddi við Elías Bj. Gíslason forstöðumann á Akureyri. Hann er nýlega kominn aftur til starfa eftir frí og sagðist ekki þekkja nákvæmlega hvort mál tengd fyrirtækinu væru á borði Ferðamálastofu. Elías var á leið Austur þegar Vísir náði tali af honum, og var staddur á Jökuldal og gat því ekki skoðað gögn. Ólöf Ýrr ferðamálastjóri er í fríi. En, Elías sagði almennt að það væri vandamál innan ferðaþjónustunnar ákveðið ábyrgðarleysi, sem sagt að vilja gera út á þjónustu annarra. Sem oft væri jafnvel ekki fyrir hendi.

Helena Þ. Karlsdóttir lögfræðingur hjá Ferðamálastofu segir að ekki liggi fyrir neinar kvartanir hjá þeim vegna starfsemi Kúkú Campers, fyrir utan þessa sem áður er nefnd, hún var að berast. Nú liggur fyrir að skoða það erindi og þá einnig hvort þetta sé eitthvað sem heyri til friðar Ferðamálastofu eða hugsanlega einhverrar annarrar stofnunar.