Myndband birt af sjálfsmorðsárás í París

Fjölmiðlar í Frakklandi hafa nú birt myndband úr öryggisvél af sjálfsmorðsárás í París í nóvember. Brahim Abdeslam sprengdi sjálfsmorðsvesti sitt á fjölmennu kaffihúsi, en var sá eini sem lét lífið þar sem vestið bilaði.

Á myndbandinu má sjá að Brahim gengur inn á mitt gólf kaffihússins Comptoir Voltair þann 13. nóvember. Árásir voru gerðar á fleiri stöðum í borginni og létu 130 manns lífið. Íslamska ríkið lýsti yfir ábyrgð á árásunum.

Rúmlega 350 manns særðust.

Eins og áður segir þá var Abdeslam sá eini sem lést þegar hann sprengdi vesti sitt. Hjúkrunarfræðingur sem var á kaffihúsinu reyndi að bjarga lífi Abdeslam. Hann hélt fyrst að gassprenging hefði átt sér stað þar til hann sá stóra holu á síðu Abdeslam og víra úr sprengjuvestinu sem hann var klæddur í.