Hollensku móðurinni boðnar allt að 50 þúsund evrur fyrir að smygla fíkniefnum til Íslands með Norrænu

Hollenska konan, sem ákærð er fyrir stórfelldan fíkniefnainnflutning hingað til lands í apríl síðastliðnum, sagði við skýrslutöku hjá lögreglu að henni hefði verið boðið að flytja fíkniefni í húsbíl og koma til Íslands með ferjunni Norrænu. Fyrir þessa ferð átti konan að fá 30.000-50.000 evrur. 50.000 evrur eru rúmar sjö milljónir króna á gengi dagsins.

Þetta kom fram við aðalmeðferð máls sem ákæruvaldið hefur höfðað gegn henni og 26 ára gömlum íslenskum karlmanni en konan er ákærð fyrir að hafa smyglað um 20 kílóum af fíkniefnum hingað. Maðurinn er ákærður fyrir að hafa tekið við tösku sem átti að innihalda fíkniefnin og ætlað að koma þeim áfram til ónafngreindra aðila svo selja mætti efnin.

Eins og kunnugt er var hollenskt par handtekið í byrjun þessa mánaðar fyrir að smygla 80 kílóum af MDMA til landsins. Þau komu til landsins með Norrænu og voru á húsbíl þar sem fíkniefnin fundust falin, meðal annars í gaskúti og niðursuðudósum. Spurningin er því hvort að sömu aðilar og hafi beðið hollensku konuna um að koma hingað í apríl hafi einnig komið að smyglinu með Norrænu.

Sá ferðatöskurnar fyrst á flugvellinum

Fyrir dómi í dag sagðist konan hafa sagt lögreglunni í upphafi frá tveimur einstaklingum í Hollandi sem hún segir hafa beðið sig um að flytja fíkniefnin til Íslands. Hún sagði lögreglunni hvað þeir heita, Jeroen og Nicky, og fann þá á Facebook. Þá kvaðst hún hafa sýnt lögreglunni hvar þeir byggju með hjálp Google Maps.

Konan hafði tvisvar áður komið til Íslands með Jeroen en hann var þá að smygla fíkniefnum til landsins. Konan taldi sig vera að smygla svipuðu magni og hún taldi hann hafa gert, eða um 2-3 kílóum. Í ljós kom hins vegar að hún var með 20 kíló í farangri sínum og dóttur sinnar sem kom með henni hingað.

Dómari í málinu spurði konuna hvenær hún hefði fyrst séð ferðatöskurnar en komið hafði fram að hún pakkaði ekki í þær sjálf. Hún sagðist fyrst hafa séð töskurnar á flugvellinum og hafði látið fólkið sem pakkaði í töskurnar fá föt og dót sem mæðgurnar ætluðu að taka með sér.

Spurði hvort að konunni hafi ekki þótt þyngd farangursins grunsamleg

Áætlað var að þær yrðu hér eina helgi, frá föstudegi til mánudags, og spurði dómarinn hvort að konunni hefði ekki fundist grunsamlegt hversu þungar töskurnar væru ef þær mæðgur voru bara með dót fyrir helgarferð.

„Ég spurði á sínum tíma ekki hvað þetta væri mikið eða hvað þetta væri því ég var búin að segja að vildi alls ekki taka meira en svona tvö kíló. Ég var því ekki mikið að hugsa um þyngdina því ég lét þau til dæmis fá hárþurrku og snyrtidót sem dóttir mín átti. Mér skilst að það hafi verið ýmislegt sem dóttir mín lét mig fá til að taka með í ferðina sem var á endanum ekki í töskunni hennar.“

Aðspurð hvort það hefði verið nauðsynlegt að taka með tvær töskur í ferðina miðað við þann farangur sem þær ætluðu að hafa með sér sagði konan svo vera. Hún sjálf hefði alltaf pakkað niður í tvær töskur því dóttir hennar vildi taka með sér mikið af snyrti-og hárdóti. Þá vildi konan líka hafa pláss fyrir íslenska minjagripi sem hún ætlaði að kaupa hér.