Serbía ekki í vandræðum með Ítalíu

Serbía vann öruggan 19 stiga sigur á Ítölum í fyrsta leik dagsins á EM í körfubolta í Berlín en leiknum lauk með 101-82 sigri Serbana. Unnu þeir því alla fimm leiki sína í riðlakeppninni en Ítalir gátu með sigri stolið toppsætinu í B-riðli.

Leikurinn var jafn framan af en Serbía hafði alltaf undirtökin í leiknum og leiddi 48-40 í hálfleik. Serbar bættu við forskot sitt í þriðja og fjórða leikhluta og unnu að lokum öruggan nítján stiga sigur. Höfðu þeir betur í öllum fjórum leikhlutunum.

Annar leikur dagsins í B-riðli hefst klukkan 15.00 en þá taka heimamenn í Þýskalandi á móti Spánverjum en lokaleikur dagsins fer svo fram klukkan 19.00 þegar íslenska landsliðið mætir Tyrklandi.