Logi: Vöðum bara óhræddir í Serbana

Logi Gunnarsson og félagar í íslenska körfuboltalandsliðinu hafa staðið sig vel í tveimur fyrstu leikjum sínum á Evrópumótinu í körfubolta.

Íslenska liðið var nærri því búið að stela sigrinum í fyrsta leiknum á móti Þjóðverjum og var þremur stigum yfir þegar þrjár mínútur voru eftir á móti Ítölum í gær.

„Núna erum við svekktir. Þessi leikur var okkar fannst mér. Við áttum meira í þessum leik á móti Ítölum en í Þýskalandsleiknum. Við áttum hreinlega skilið að vinna þennan leik," segir Logi Gunnarsson um tapleikinn við Ítalíu.

„Þeir skoruðu á réttum tímapunkti í endann og kláruðu leikinn á mörgum reyndum leikmönnum. Þeir voru klárir í endann og fengu skotin sem þeir vilja fá. Við erum líka svolítið óheppnir og það er svolítið erfitt að horfa upp á okkur klikka á vítaskotunum. Það svíður svolítið," segir Logi en íslenska liðið hitti mun betur á móti Ítalíu en í fyrsta leik á móti Þýskalandi.

„Við vorum að fá góð skot og vorum að dreifa boltanum. Þeir áttu í miklum vandræðum með okkur. Við fundum það að þeir voru seinir á löppunum þegar við vorum að láta boltann ganga hratt. Við vorum að keyra inn í teig og gefa boltann aftur út og þannig fengum við fullt af góðum skotum," segir Logi.

Íslenska liðinu hefur gengið illa að nýta sóknir sínar undir lok leikjanna og það hefur haft mikið að segja að þeir töpuðust báðir.

„Varnir mótherjanna herðast í enda leikjanna og liðin reyna náttúrulega að leita uppi okkar bestu menn sem eru að fara að klára sóknirnar og reyna að stöðva þá. Varnirnar á móti okkur verða bara betri í endann en við verðum bara að halda áfram og læra af þessu," segir Logi.

„Við þurfum að klára leikina betur og ákvarðanatökurnar verða aðeins að vera betri. Þetta var samt flott heilt yfir og við erum mjög svekktir," segir Logi.

Íslenska liðið fær nú einn hvíldardag til að jafna sig fyrir þrjá síðustu leikina í riðlinum.

„Þessir fyrstu tveir leikir tóku mikla orku og við fáum því kærkomna hvíld. Svo förum við bara í Serbaleikinn alveg eins og þennan leik. Þar eru við að fara að mæta einu af tveimur bestu liðum heims. Við erum ekki hræddir við neinn og vöðum í þá eins og við gerðum í leikjunum á móti Þýskalandi og Ítalíu," segir Logi.