„Ekki vera latur dúllubangsi“

Sigmundur Davíð Gunnlaugsson forsætisráðherra birti í gærkvöldi yfirlýsingu á Facebookvegg sínum þar sem hann útskýrir hvers vegna hann fór ekki til Parísar, líkt og flestir þjóðarleiðtogar heims gerðu, til að votta fórnarlömbunum á tímaritinu Charlie Hebdo virðingu og stilla sér upp með tjáningarfrelsinu.

Það má vera til marks um hversu heitt fólki er í hamsi vegna málsins að aldrei hafa sést á vegg Sigmundar Davíðs afdráttarlausari ummæli þar sem honum er hreinlega mótmælt.Lilja Björg Jökulsdóttir, en vísað er í ummæli hennar í fyrirsögn þessarar samantektar, segir: „Simmi simmi elsku simmi minn. Svona ástæður ganga ekki sem afsökun. Eftir allt saman varstu kosinn af einhverjum öðrum til að vera mikilvægur fyrir mig. Ekki vera latur dúllubangsi. Lov jú longtæm og horfðu aftur á back to the future fyrir mig. P.s. ég veit að það er gott að vera heima en ekki vera heimskur simmi minn.“

Lilja er með þeim kurteisari sem tjáir sig á vegg Sigmundar Davíðs, og eru ósátt við það að forsætisráðherra hafi setið heima en ekki undirstrikað það með för sinni að Ísland er þjóð meðal þjóða. Magnus Þ Gislason segir: „Skilaðu fálkaorðunni Sigmundur, þú átt hana ekki skilið eftir þessi mistök. Mikið rosalega finnst mér þú vera vanhæfur í embættinu, aumingja allt fólkið sem kaus ykkur, fáum við kanski að sjá flokkinn undir 5 prósentum í næstu kosningum?“ Fjölmargir eru umbúðarlausari í tjáningu sinni.

Og ýmsum þykir sem forsætisráðherra hafi engan veginn svarað þeim spurningum sem eru uppi um þetta mál. Ruth Bergsdottir: „Enn og aftur - af hverju í ósköpunum fórst þú ekki út?“ Og Magnús Páll Hjálmarsson: „Þegar að menn gefa skít í samlanda sína og þjóð afhverju ættu þeir ekki að gefa skít í Frakka líka?“ Og þannig má lengi áfram telja.

Á móti kemur að margir eru miður sín vegna þess hvernig fólk leyfir sér að ávarpa forsætisráðherra á hans heimavelli. Ellý Ben: „Það er með hreinum ólíkindu hvað fólk er oft illa innrætt og þarf alltaf að búa til áður en það veit sannleikann. Heimurinn væri betri ef menn litu í eigin barm í stað að drulla yfir allt og alla.“

Sigmundur Davíð á sér marga stuðningsmenn sem rísa upp honum til varnar, og meðal þeirra er Anna Sigríður Snæbjörnsdóttir: „Það er sama hvort maðurinn fer eða ekki og hvað skýringar hann gefur , sjálfskipaðir siðferðispostular sem telja sig hafa einu réttu skoðunina og hafa alltaf rétt fyrir sér eru alltaf tilbúnir á skotpöllunum. Þó fólk sé ekki sammála í pólitík er óþarfi að nota þetta ótrúega rætna orðbragð sem margir láta flakka án allrar ábyrgðar.“

Sjón er sögu ríkari, athugasemdakerfi Facebooksíðu forsætisráðherra segir sína sögu. Blaðamaður Vísis gerði meira að segja tilraun, á þessum sama vettvangi, til að fá fram svar við ítarlegri spurningum sem hafa vaknað, en án árangurs: „Hafa skal það sem sannara reynist? Spurningarnar sem eru uppi eru einfaldlega þessar: Af hverju fórstu ekki og fyrst þú komst því ekki við, af hverju fór þá enginn úr ráðherraliðinu? Finnst þér þú hafa svarað þeim spurningum?“

Innlegg frá Sigmundur Davíð Gunnlaugsson.