Lifa í draumi eins og skáldið orti forðum

„Þetta er skemmtileg saga nefnilega hvernig þetta fór svona, við kynntumst strákunum í Johnny á Airwaves í fyrra og upphófst skemmtilegt samstarf þar sem við spiluðum mikið af tónleikum saman í vetur,“ segir Logi Marr, gítarleikari hljómsveitarinnar Lily of the Valley. Hljómsveitin sendi nýverið frá sér nýtt lag sem heitir Back og fengu strákana í Johnny and the Rest til að taka upp lagið með sér.

„Við tókum svo tónleikatúr um landið í sumar og kórónuðum sumarið svo með því að fara í hljóðverið saman. Þetta er í raun okkar draumur að fá að spila tónlist með svona frábæru fólki svo við erum að lifa í draumi eins og skáldið orti,“ segir Logi.

Með Back fylgir hljómsveitin Lily of the Valley eftir laginu I'll be waiting sem hefur gert það gott á öldum ljósvakans og lofar Logi að sveitin eigi eftir að troða upp hér og þar í nánustu framtíð.