Masters 2012: Tiger Woods ætlar sér enn sigur | er í 40.-46. sæti

„Ég lagði mig fram og reyndi mitt besta við hvert einasta högg. Halda einbeitingunni og slá næsta högg eins og ég ætlaði mér – það gekk nánast aldrei upp en ég var að reyna eins og ég gat," sagði Tiger Woods eftir að hafa leikið á 75 höggum á öðrum keppnisdegi Mastersmótsins í golfi. Tiger, sem er fjórfaldur sigurvegari á þessu risamóti, er samtals á +3 í 40.-46. sæti mótsins þegar kepni er hálfnuð.

„Sveiflan var ekki í lagi og ég reyndi að vera þolinmóður, en það voru nokkrir ljósir punktar við hringinn. Ég var tvo undir pari eftir þrjár holur en ég klúðraði því."

Tiger er enn vongóður um að geta gert atlögu að titlinum en Fred Couples og Jason Dufner eru efstir á -5 og er Tiger 8 höggum á eftir þeim. „Það sem einkennir þetta mót er að þeir sem komast í gegnum niðurskurðinn eiga allir möguleika á sigri. Það hefur gerst að sigurvegarinn hefur unnið upp 5-6 högg á lokadeginum. Ég stefni á að bæta stöðu mína á þriðja hringnum og á sunnudeginum getur allt gerst," sagði Tiger í sjónvarpsviðtali eftir hringinn í gær.

Tölfræðin er ekki með Tiger Woods að þessu sinni. Sigurvegarinn á Mastersmótinu hefur aldrei verið neðar en í 25. sæti þegar keppni er hálfnuð. Tiger Woods þarf því að skrifa nýjan kafla í sögu Mastersmótsins ætli hann sér að ná að landa sigri í fimmta sinn á ferlinum.