Óliver var með funheitan pútter

Óliver Elí tryggði sér titilinn þegar hann hafði betur gegn Svíanum Ludwig Libera í 37 holu úrslitaleiknum en íslenski kylfingurinn landaði sigrinum með því að ná fugli á fyrstu holu bráðabanans.

Óliver Elí var þarna að vinna eitt sterkasta unglingamót Evrópu og eitt elsta golfmót heims, en það var nú haldið í 106. sinn. Á meðal fyrrverandi sigurvegara eru stórstjörnur á borð við José María Olazábal, Sergio García og Matthew Fitzpatrick.

„Vá, þvílík vika hér í Skotlandi. Ég hefði aldrei trúað því eða sagt að ég væri sigurvegari The Boys Amateur Championship,“ skrifaði Óliver Elí á samfélagsmiðla sína.

„Mér tókst að spila virkilega traust og stöðugt golf eftir fyrsta hringinn og komst í gegnum niðurskurðinn á hárréttri tölu,“ skrifaði Óliver.

„Ég er virkilega ánægður með hvernig ég spilaði í holukeppninni og það hjálpaði mikið að vera með funheitan pútter,“ skrifaði Óliver.

Hann lenti um tíma þremur holum undir á móti Svíanum en Óliver sýndi þá enn á ný þá miklu yfirvegun og baráttu sem einkenndi frammistöðu hans alla vikuna. Eftir tólf holur seinni hringsins var Svíinn kominn með þriggja holu forskot en okkar maður hélt haus, jafnaði leikinn á 17. holunni og tryggði sér svo titilinn á fyrstu holu bráðabanans.