Guð­rún Brá Ís­lands­meistari og föðurbetrungur

Guðrún Brá mætti til leiks í dag með þriggja högga forskot á Elsu Maren Steinarsdóttur og fjórum höggum á undan Ragnhildi Kristinsdóttur.

Það færðist spenna í leikinn þegar Guðrún fékk skolla á fyrstu braut, en hún fékk örn á sjöundu og svo annan skolla á þeirri níundu. Ragnhildur sótti hressilega að henni með þremur fuglum á fyrstu níu og aðeins höggi munaði þá á þeim.

Ragnhildi fataðist hins vegar flugið á síðari níu og að endingu var spennan ekkert gríðarleg þar sem Guðrún Brá spilaði afar stöðugan leik í dag. Hún fékk einn fugl og einn skolla á seinni níu og par á síðustu sjö brautum vallarsins.

Guðrún Brá lauk leik á einu höggi undir pari, fimm höggum á undan Elsu Maren sem varð önnur á fjórum yfir pari og sjö á undan Ragnhildi sem varð þriðja á sex yfir pari.

Það hefur verið yfirlýst markmið Guðrúnar Brár að slá föður sínum, Björgvin Sigurbergssyni, við í titlafjölda en hann vann á sínum ferli fjóra Íslandsmeistaratitla; 1995, 1999, 2000 og 2007.

Guðrún Brá er nú Íslandsmeistari í fimmta sinn og annað árið í röð. Hún varnn þrjú ár í röð milli 2018 og 2020, fjórða titilinn 2025 og þann fimmta í dag.