Forlan útilokar ekki að skipta um félag

Úrúgvæski framherjinn Diego Forlan vill alls ekki útiloka þann möguleika að skipta um lið í sumar en hann spilar sem stendur með Atletico Madrid á Spáni.

Tottenham er á meðal þeirra félaga sem hafa sýnt framherjanum áhuga. Skal engan undra þar sem Forlan hefur farið á kostum á HM.

"Það þarf samt að koma gott tilboð til þess að ég skoði það. Ég er mjög ánægður í Madrid. Bæði með liðið og lífið. Maður veit samt aldrei," sagði Forlan.

Hann hefur áður leikið í ensku úrvalsdeildinni með Man. Utd en náði sér aldrei á strik með félaginu.