Andres Iniesta: Versta sumarið mitt á ævinni

Andres Iniesta, miðjumaður Barcelona og spænska landsliðsins, er að komast aftur af stað eftir að hafa glímt við erfið meiðsli sem hafa haldið honum frá fótboltavellinum í meira en hundrað daga.

Andres Iniesta meiddist rétt fyrir úrslitaleik Meistaradeildarinnar en fórnaði sér og lék meiddur í leiknum. Það gerði illt verra fyrir hann sjálfan en hjálpaði Barcelona að vinna leikinn. Iniesta átti meðal annars stoðsendinguna á Samuel Eto'o í fyrsta marki leiksins.

„Ég vissi að ég ætlaði að spila þennan leik þótt að ég væri meiddur. Ég vissi líka að þá myndi ég skemma meira. Ég hugsaði bara um leikinn í þessa sautján daga og ætlaði að láta ekkert stoppa mig. Ég myndi gera þetta aftur ef þessi stað kæmi upp á ný," segir Andres Iniesta en þetta kostaði sitt.

„Þetta hefur verið versta sumarið mitt á ævinni," sagði Iniesta og segir það bæði vera vegna þess að meiðslin hafa komið í veg fyrir að hann hafi geta æft og spilað með Barcelona en einnig vegna fráfalls Dani Jarque sem var góður vinur hans.

„Það eru alltaf einhverja ástæður fyrir því að þú meiðist. Ég hef unnið með læknum og sjúkraþjálfurum í allt sumar til þess að sjá til þess að ég meiðist ekki svona aftur," sagði Iniesta.

„Nú er ég orðinn góður og tilbúinn til að fara að spila fótbolta á nýjan leik. Ég mun njóta þess enn meira að spila með Barcelona eftir að hafa gengið í gegnum þennan erfiða tímabil," sagði Iniesta og bætti við: „Ég er búinn að æfa á fullu í eina og hálfa viku og allt er í góðu. Mér líður mjög vel og ég er klár í næsta leik," sagði Iniesta.