Usain Bolt opnar leiktíðina hjá Real Madrid

Fljótasti maður heims, Usain Bolt, verður á Santiago Bernabeau í kvöld og mun taka upphafssparkið í opnunarleik Real Madrid í kvöld gegn Deportivo.

Bolt mun skokka niður á völlinn fyrir leik, taka upphafssparkið áður en hann fær sér aftur sæti í VIP-stúkunni hjá Florentino Perez og félögum.

Bolt er mikill knattspyrnuáhugamaður. Hann hefur áður lýst því yfir að hann sé mikill stuðningsmaður Man. Utd en hann er einnig aðdáandi Real Madrid til margra ára.

Bolt segist sérstaklega vera mikill aðdáandi Ruud Van Nistelrooy og Raul. Hann er ein af mörgum stjörnum sem styðja Real en meðal annarra frægra má nefna ökuþórinn Fernando Alonso og tennisstjörnuna Rafael Nadal.

Það er mikil eftirvænting fyrir leik kvöldsins enda mun Real tefla fram Cristiano Ronaldo, Kaká, Karim Benzema og Xabi Alonso í fyrsta leik sínum á tímabilinu.