Ronaldinho: Ég hef aldrei verið í betra formi

Ronaldinho, brasilíski snillingurinn hjá Barcelona, kveðst aldrei hafa verið í betra formi og að hann hafi verið staðráðinn í að sýna það í leiknum gegn Atletico Bilbao í gær. Ronaldinho var stórkostlegur í leiknum, en fyrir nokkrum dögum voru birtar myndir sem gáfu til kynna að hann hefði fitnað um nokkur kíló.

Hinn 26 ára gamli Ronaldinho var í essinu sínu gegn Bilbao og gladdi augu áhorfenda nokkrum sinnum með snilldar tilþrifum. Eftir leikinn sagðist Ronaldinho ekki hafa neitt að fela og að hann væri í sínu besta formi á ferlinum.

"Ég hef ekkert að fela. Ég skipti alltaf á treyju minni við aðra leikmenn," sagði Ronaldinho og átti þar við myndirnar sem birtust af honum berum af ofan eftir leikinn gegn Liverpool. "Það er verið að gefa í skyn að ég sé feitur en mér líður mjög vel. Ég hef alltaf hugsað vel um mitt líkamlega form og það hefur aldrei verið betra. Eftir allt sem hefur verið sagt og skrifað um mig er ég enn staðráðnari í að standa mig," sagði Ronaldinho.