Bara Vodafone

Og Vodafone heitir nú bara Vodafone. Nýr tímamótasamningur við alþjóðlega stórfyrirtækið Vodafone Group um nánara samstarf var kynntur í morgun. Vodafone á Íslandi er fyrsta sjálfstæða farsímafélagið sem fær að nota vörumerki Vodafone.

Árni Pétur Jónsson, forstjóri Vodafone á Íslandi, segir að samningurinn tryggi betri þjónustu þar sem íslenskir notendur njóti fyrr en ella nýjunga sem Vodafone þróar og markaðssetur. Íslendingar í útlöndum og ferðamenn á Íslandi eiga auk þess von á greiðari aðgangi að neti og þjónustu Vodafone.

Matthias Jungemann framkvæmdastjóri hjá Vodafone Group segir íslenska markaðinn framsækinn og kröfuharðan og það séu mikil meðmæli með íslenska fyrirtækinu að það fái að nota Vodafone nafnið eitt og sér.