Sterkur ríkissjóður eða lök hagstjórn

Gert er ráð fyrir nítján milljarða króna afgangi á ríkissjóði í fjárlagafrumvarpi ríkisstjórnarinnar sem verður að lögum í dag. Stjórnarliða og stjórnarandstæðinga greinir þó á um hvort þau séu til marks um sterka stöðu ríkissjóðs eða að ekki sé tekið á óróa í efnahagslífinu.

Þingmenn tókust á um fjárlög næsta árs á þingfundi sem stóð fram yfir miðnætti síðustu nótt en frumvarpið var þá til þriðju og síðustu umræðu. Stjórnarliðar gerðu litlar sem engar tillögur um breytingar á frumvarpinu frá 2. umferð umræðna um það en stjórnarandstæðingar lögðu til aukin útgjöld, einkum til heilbrigðis- og öldrunarmála en einnig til Ríkisútvarpsins auk fleiri þátta.

Magnús Stefánsson, formaður fjárlaganefndar, segir fjárlögin til marks um sterka stöðu ríkissjóðs enda sé gert ráð fyrir ríflegum afgangi.

Jón Bjarnason, fulltrúi Vinstrihreyfingarinnar - græns framboðs í fjárlaganefnd er annar skoðunar. Hann segir fjárlagafrumvarpið fyrst og fremst bera með sé að efnahagsstjórnin sé ekki tekin nógu sterkum tökum.