Og Vodafone yfirtekur Fjöltengi

"Þetta held ég að allir hafi séð fyrir nema Alfreð Þorsteinsson og Ingibjörg Sólrún Gísladóttir á sínum tíma," segir Guðlaugur Þór Þórðarsson, borgarfulltrúi Sjálfstæðisflokksins, en fjarskiptafyrirtækið Og Vodafone hefur að mestu lokið yfirtöku á Fjöltengi, internetfyrirtæki Orkuveitu Reykjavíkur. Fjöltengi hefur um tíma veitt heimilum að internetþjónustu gegnum rafmagnslagnir en slíkt hafa engir aðrir boðið hingað til. Verkefnið var á sínum tíma lofað sem næstu byltingu á fjarkskiptamarkaðnum en minna orðið úr en efni stóðu til. Guðlaugur segir að þarna hafa verið um að ræða R-lista drauminn sem varð að martröð. "Þegar þetta stóð fyrst til átti þetta að kosta nokkur hundruð milljónir króna en heildarkostnaður vegna internetsáráttu samtakanna eru nú í kringum sex milljarðar króna og ekki allt talið enn." Alfreð Þorsteinsson segir að yfirtaka Og Vodafone hafi verið ákveðin fyrir allnokkru en hann veit ekki nákvæmlega hvenær yfirtökuferlinu ljúki endanlega.