Rahm myndi sætta sig við sömu refsingar og Koepka fékk

Rahm er þó ekki viss um að honum verði boðinn sami samningur eftir að hafa yfirgefið LIV Golf-deildina.

Rahm segir að hann hafi enn ekki rætt við PGA-mótaröðina um mögulega endurkomu þar sem hann eignaðist nýlega sitt fjórða barn.

Fái Rahm ekki að keppa á PGA-mótaröðinni fyrr en hann hefur afplánað eins árs keppnisbann, sem er sú refsing sem fyrrverandi Masters-meistarinn Patrick Reed og fleiri sættu eftir að hafa yfirgefið LIV Golf, kveðst Rahm reiðubúinn að keppa á DP World-mótaröðinni árið 2027.

„Hvað PGA-mótaröðina varðar eru hlutirnir aðeins öðruvísi,“ sagði Rahm við fréttamenn á þriðjudag á Abu Dhabi Aldar Championship-mótinu. „Ég hef ekki enn getað rætt við þá. Þangað til hlutirnir eru frágengnir, sem verður vonandi fljótlega, og svo sjáum við til,“ sagði Rahm.

Við vitum hvað þeir gerðu við Brooks

„Ég veit ekki hvað bíður okkar. Við vitum hvað þeir gerðu við Brooks. Þetta eru aðrar aðstæður. Ég veit ekki hvernig hlutirnir munu líta út. En það er ansi gott öryggisnet að geta spilað á DP World-mótaröðinni á næsta ári og ef til þess kemur hlakka ég mikið til að spila þar í heilt ár,“ sagði Rahm

Í janúar sneri Koepka aftur á PGA-mótaröðina samkvæmt nýju endurkomukerfi (Returning Member Program), sem gerði LIV-kylfingum sem höfðu verið fjarri mótaröðinni í að minnsta kosti tvö ár – og höfðu unnið Players Championship eða eitt af risamótunum fjórum (Masters, PGA, Opna bandaríska og Opna breska) frá árinu 2022 – kleift að snúa aftur með ákveðnum skilyrðum og þungum fjárhagslegum refsingum.

Meðal skilyrða fyrir endurkomu Koepka var að fimmfaldi risamótameistarinn samþykkti að afsala sér öllum hlutabréfum leikmanna næstu fimm árin og hann átti ekki rétt á þátttöku í hundrað milljóna dala bónuskerfi FedEx Cup árið 2026. Að beiðni PGA-mótaraðarinnar samþykkti Koepka einnig að gefa fimm milljónir dala til góðgerðarmála.

Aðrir LIV-kylfingar sem áttu rétt á að snúa aftur voru meðal annars Rahm, Bryson DeChambeau, sigurvegari Opna bandaríska 2024, og Cameron Smith, sigurvegari Players Championship og Opna breska 2022. Allir ákváðu þeir að vera áfram hjá LIV Golf.

Af hverju ekki?

Á þriðjudag sagðist Rahm reiðubúinn að gera nákvæmlega það sama og Koepka gerði til að snúa aftur.

„Líklegast, já,“ sagði Rahm. „Af hverju ekki? Já, en það er stórt ef. Ég efast stórlega um að mér verði boðinn sami samningur og Brooks fékk. En já, ef mér yrðu boðnar nákvæmlega sömu refsingar og honum myndi ég líklega gera það, já,“ sagði Rahm.