Verðbólguþrýstingurinn að gefa eftir

Greiningardeildin birti í morgun hagspá til ársins 2029. Þar segir að á síðustu vikum hafi dregið úr óvissu innanlands og að það megi að mörgu leyti líta á framtíðina björtum augum. 

„Við teljum að vaxtahækkunarferlinu sé lokið og óvissa um framhald kjarasamninga hefur minnkað. Horfur hafa því batnað og við teljum líklegt að vaxtalækkanir geti hafist snemma á næsta ári,“ segir í hagspánni.

Það þýði þó ekki að veturinn verði léttur. Því er spáð að atvinnuleysi aukist en taki smám saman a minnka á næsta ári. Fasteignamarkaðurinn verður áfram rólegur og vöxtur einkaneyslu hægari. Óvissa um alþjóðlega þróun, ekki síst olíuverð, er enn mikil. 

Hófstilltar verðhækkanir

Deildin spáir hófstilltum hagvexti næstu ár, 1,3 prósent og 1,5 prósent næstu tvö ár. Hann verði borinn upp af fjölbreyttum útflutningi. 

„Álútflutningur nær sér á strik ásamt því sem við gerum ráð fyrir vexti í ferðaþjónustu og að fjölbreyttir vaxtarsprotar halda áfram að blómstra. Við spáum samdrætti í íbúðafjárfestingu næstu ár og afar hófstilltum verðhækkunum á íbúðamarkaði. Það má þó gera ráð fyrir áframhaldandi framgangi ýmissa stærri fjárfestingaráforma, til að mynda tengt orkuöflun og gagnaverum,“ segir í hagspánni. 

Verðbólgan hafi náð hámarki þegar hún fór í 5,9 prósent. Hún ætti að verða komin undir fimm prósent á fjórða ársfjórðungi næsta árs. Er sú spá rökstudd með því að slaki hafi myndast á vinnumarkaði og húsnæðismarkaði, sátt náðist á vinnumarkaði og ríkið ætli að halda aftur af gjaldahækkunum. 

Vextir niður í febrúar

Peningastefnunefnd muni hefja vaxtalækkunarferlið í febrúar og vaxtastigið fylgja verðbólgunni niður. 

„Raunvextir verða nokkuð stöðugir allt spátímabilið, fara hæst í ríflega 3% en verða almennt á bilinu 2-3% á meðan verðbólga lækkar í átt að markmiði.“