Mikael lagði upp og meiddist en Logi í basli gegn Salah

Vinstri bakverðirnir tveir í íslenska landsliðinu voru báðir í eldlínunni. Mikael Egill byrjaði að venju hjá Genoa sem byrjaði vel gegn Fiorentina í dag.

Mikael lagði upp mark fyrir Milutin Osmajic eftir sjö mínútna leik og aðeins korter var liðið þegar Junior Messias tvöfaldaði forystuna. Staðan var 2-0 þar til Johan Vasquez skoraði sjálfsmark en það dugði skammt fyrir Flórensbúa.

Mikael Egill fór hins vegar meiddur af velli þegar tæpar 10 mínútur voru eftir en Genoa vann þó 2-1.

Logi Tómasson fékk gult spjald í 3-0 tapi Samsunspor fyrir Trabzonspor á heimavelli þar sem hans menn voru þó manni fleiri allan síðari hálfleikinn. Loga tókst þó að halda Mohamed Salah frá því að skora fyrir Trabzonliða í leiknum.

Trabzonspor er með 13 stig í þriðja sæti en Samsunspor fer agalega af stað á leiktíðinni og er með fjögur stig í 16. sæti sem jafnframt er fallsæti.