Við­brögðum fram­kvæmda­stjóra Manchester City lekið í BBC

Á föstudaginn síðastliðinn láku þær upplýsingar út til fjölmiðla að Manchester City hefði verið fundið sekt í 114 ákæruliðum af þeim 115 sem var að finna í málsókn sem enska úrvalsdeildin höfðaði gegn félaginu fyrir brot á fjármálareglum deildarinnar. 

Soriano, framkvæmdastjóri Manchester City, tók til máls á lokuðum stjórnarfundi samtaka Evrópskra knattspyrnufélaga í Kaupmannahöfn í dag en aðalfundur samtakanna fer þar fram á morgun. 

Er Soriano þar sagður hafa heitið því að berjast gegn ákærunum og að það væri enn langt í land þar til málið yrði til lykta leitt.

BBC hefur þetta eftir heimildum sínum en ummæli Soriano eru í sama tón og stjórnarformaður Manchester City, Khaldoon Al Mubarak, sló í yfirlýsingu til stuðningsmanna á dögunum. 

Fjöldi félaga í ensku úrvalsdeildinni undirbýr nú mögulegar málsóknir gegn Manchester City.

Félög hafi um nokkurt skeið leitað til þekktra lögfræðinga til að kanna hvort þau geti krafið City um skaðabætur vegna meintra brota félagsins sem enska úrvalsdeildin hefur ekki enn staðfest að félagið hafi fundist sekt við. Viðræður milli félaga hafa nú færst í aukana.