Skora á Isavia að stækka „ræningjarennuna“

Ökumenn sem aka rennuna fá fimm mínútur til að skila af sér farþegum og farangri. Eftir það byrjar mælir að tikka og ökumenn eru rukkaðir um fimm hundruð krónur fyrir hverja mínútu. Í frægu atriði úr Áramótaskaupinu 2025 er grínast með stressið sem fylgir því að koma öllum og öllu út á þessum stutta tíma. 

Hvergi jafn dýrt

FÍB gerði könnun á fyrirkomulaginu hjá tíu flugstöðvum í Evrópu. Félagið segir að hvergi sé sami „fantaskapur“ sýndur og Isavia gerir með rennunni. 

„Allar hinar flugstöðvarnar sýna meiri lipurð og skilning gagnvart fólki sem er að mæta í flug. Oftast eru gefnar 10 mínútur til að afferma og kveðja áður en farið er að rukka fyrir lengri viðveru. Ekki er innheimt fyrir hverja mínútu, heldur fyrir byrjaðan tímaramma, ýmist 5, 15 eða 20 mínútur,“ segir í færslu á vef félagsins. 

Gjaldið sé á flestum stöðum hóflegt. Í Frankfurt greiða ökumenn fimm hundruð krónur fyrir næstu tíu mínútur eftir fríar tíu mínútur og í Ósló eru sjö ókeypis mínútur og þúsund krónur greiddar fyrir hverjar byrjaðar tuttugu mínútur eftir það. Á Heathrow í London greiða ökumenn 1.200 krónur fyrir að keyra að flugstöðinni með farþega en engin tímamörk. 

„Við flugvellina í Kaupmannahöfn, Genf og Amsterdam er einfaldlega ekki reynt að krefjast greiðslu fyrir að skutla fólki í flug. Bílstjórnar eru einfaldlega beðnir um að vera ekkert að hangsa og starfsfólk stjakar við ef með þarf,“ segir í færslunni. 

Ökumenn festist

FÍB gagnrýnir einnig hve fá bílastæði eru í rennunni og segir ökumenn lenda í því að keyra inn í rennuna og komast síðan ekki að til að hleypa farþegum út. 

„Vissulega býður Isavia bílstjórum að stoppa án endurgjalds í allt að 15 mínútur á P1-stæðinu fyrir framan flugstöðina. Þar er hins vegar frekar snúið fyrir marga að athafna sig, því einatt eru stæðin þar full og þarf þá að stoppa í akveginum. Fæstir víkja nógu vel til að aðrir komist fram hjá og því verða til stíflur þar sem enginn kemst áfram,“ segir í greininni.

„Ef Isavia væri annt um viðskiptavini sína þá myndi fyrirtækið stækka sleppirennuna á kostnað P1-stæðisins og lengja gjaldfrjálsa tímann í 8-10 mínútur.“