Bein útsending: Dregið í Meistaradeild Evrópu

Sindri Sverrisson skrifar 27. ágúst 2026 15:47

Luis Enrique hefur leitt PSG til sigurs í Meistaradeild Evrópu tvö ár í röð. Getty/Mike Egerton

Fimm ensk lið, fimm spænsk og tvö norsk eru á meðal þeirra sem spila í Meistaradeild Evrópu í haust. Í dag verður dregið um hvaða átta mótherjar bíða hvers liðs í deildarkeppninni, í beinni útsendingu á Vísi og Sýn Sport.

Alls eru 36 lið í keppninni líkt og tvö síðustu tímabil og spila þau öll saman í einni deild. Fyrir dráttinn var þeim skipt í fjóra níu liða styrkleikaflokka og fékk hvert lið tvo mótherja úr hverjum flokki — annan á heimavelli en hinn á útivelli. Hvert lið spilar því átta leiki.

Átta efstu liðin í deildinni komast svo beint í 16-liða úrslit keppninnar og liðin í 9.-24. sæti komast í umspil um sæti í 16-liða úrslitunum.

Beina útsendingu frá drættinum, sem hófst klukkan 16:00, má sjá hér að neðan.

Búið er að draga fyrir liðin í efstu tveimur styrkleikaflokkunum og má sjá leikjadagskrá þeirra hér að neðan. Greinin verður uppfærð að drætti loknum.

Úr efsta styrkleikaflokki má nefna að Evrópumeistarar PSG, Barcelona og Manchester City mætast innbyrðis. Englandsmeistarar Arsenal mæta meðal annars José Mourinho og hans mönnum í Real Madrid, og þýsku liðunum Bayern og Dortmund.

Liverpool var nokkuð heppið með drátt en mætir til að mynda Atlético Madrid og Inter. Norsku liðin tvö í keppninni, Bodö/Glimt og Viking, mæta bæði Bayern og Atlético.

Leikjadagskrá liðanna í efsta styrkleikaflokki. Hvert lið fær átta leiki, tvo gegn liðum úr hverjum styrkleikaflokki og þar af annan á heimavelli en hinn á útivelli.UEFA

Í 2. styrkleikaflokki voru meðal annars Aston Villa og Manchester United sem nú er með í keppninni á nýjan leik eftir tveggja ára fjarveru, og því í fyrsta sinn með eftir breytingar á fyrirkomulaginu.

United mætir Bayern og Atlético Madrid, sem og Roma, Sporting, Leipzig, Villarreal, Sabah frá Aserbaísjan og lærisveinum Cesc Fabregas í Como sem nú eru með í fyrsta sinn.