„Eftir að koma í ljós“ hvort ís­lenskar á­hafnir manni leigu­flug Icelandair

Kaupin vöktu á sínum tíma óöryggi meðal starfsfólks og voru síst til þess fallin að láta kjaraviðræður við f-stéttirnar svokölluðu – flugmenn, flugfreyjur og flugvirkja – ganga betur en samningar þeirra höfðu þá verið lausir mánuðum saman. Eftir létta pústra milli flugmanna og Icelandair þar sem meira en tuttugu brottfarir frá Íslandi voru felldar niður setti ríkissáttasemjari upp verkáætlun fyrir viðræðurnar, sem standa myndu út sumarið.

Formaður Félags íslenskra atvinnuflugmanna, FÍA, sagði á föstudaginn síðastliðinn að ágætis gangur væri í viðræðum en að best væri að vera ekki með stórar yfirlýsingar á þessum tímapunkti. Ekkert hefur frést af viðræðum stéttarfélaga flugfreyja og flugvirkja síðustu mánuði. Mögulega ætla þau félög að leyfa flugmönnum að ríða á vaðið og kíkja í pakkann, ef svo má að orði komast.

„Það þarf að fara yfir það þegar nær dregur,“ sagði Bogi Nils þegar Smári Jökull fréttamaður spurði forstjórann út í hvort að það að manna vélar dótturfélags Icelandair með erlendum flugmönnum bryti ekki gegn svokölluðu forgangsákvæði í kjarasamningi flugmanna. Ákvæðið segir til um að félagsmenn FÍA eigi forgang í að manna flug á vegum Icelandair.

Kaupin auki hagræði og sveigjanleika

Í tilkynningu frá Icelandair um kaupin á hlutnum kom fram að félagið myndi með kaupunum öðlast aðgang að viðbótarflugrekstrarleyfi innan Evrópu. Sagt var að kaupin ykju sveigjanleika og hagræði í rekstri félagsins, styddu við áframhaldandi uppbyggingu og sköpuðu ný viðskiptatækifæri.

Félagið hefur greint frá því að síðustu Boeing 757-vélar félagsins muni yfirgefa flotann á næstu mánuðum. Flugvélategundin er komin til ára sinna og hefur Icelandair síðustu ár hægt og rólega skipt henni út fyrir nýrri og sparneytnari vélar.

Til stendur að þær 757-vélar sem eftir eru færist yfir til leiguflugsarms Icelandair-samstæðunnar, Loftleiða. Vélarnar verði færðar yfir á maltneska flugrekstrarleyfið þaðan sem þær geti bæði verið leigðar áfram til annarra flugfélaga og sinnt leiguflugi á vegum Icelandair.

Bogi Nils segir að eftir verði yfir tuttugu Boeing 737 MAX-vélar og að hinar nýju Airbus A321-vélar félagsins verði brátt orðnar fjórtán talsins. Bogi segir að kaupin á hlutnum í FlyPlay Europe muni auka hagræði í rekstri Icelandair og gera félaginu kleift að einblína betur á rekstur félagsins hér á Íslandi. Kaupin breyti því ekki að flugrekstur félagsins verði áfram fyrst og fremst gerður frá Íslandi.

Ekki er um að ræða stóra fjárfestingu fyrir félag sem veltir tugmilljörðum en kaupin hljóða upp á 686 þúsund bandaríkjadali, eða um 84 milljónir íslenskar. Fyrir það eignast Icelandair 49 prósenta hlut í maltneska félaginu en heimild er í samkomulaginu til að auka við hann síðar meir. Kaupin eru háð samþykki maltneskra yfirvalda.

Keflavík áfram heimahöfn Icelandair

„Við erum með mun meiri árstíðasveiflu heldur en flest önnur flugfélög sem við erum að keppa við en minni sveigjanleika til að bregðast við því,“ segir Bogi Nils. Stjórnendur félagsins hafa í gegnum tíðina verið gagnrýnir á sterka kjarasamninga flugmanna og flugfreyja og sagt þá vinna gegn sveigjanleika í rekstri. Bogi Nils segir að mögulegt verði að bregðast betur við árstíðasveiflunni með því að færa vélar þangað yfir vetrartímabilið.

„Það er framtíðarstefnan okkar hvað þetta varðar en allt snýr þetta að því að styrkja starfsemina hér á Íslandi,“ sagði Bogi Nils í kvöldfréttum okkar.