Viðskipti innlent

Árni skattakóngur annað árið í röð

Árni Sæberg skrifar
Árni Sigurðsson er aðstoðarforstjóri JBT Marels.
Árni Sigurðsson er aðstoðarforstjóri JBT Marels. Marel

Árni Sigurðsson, aðstoðarforstjóri JBT Marel, var launahæstur Íslendinga árið 2025, með rúmar 46 milljónir króna á mánuði. Hann var einnig tekjuhæstur í fyrra en var þá með ívið lægri laun, eða rúmar 40 milljónir á mánuði.

Þetta segir á vef Viðskiptablaðsins og Frjálsrar verslunar, en tekjublað þess síðarnefnda kom út í dag. Rétt er að árétta að þar er um allar útsvarsskyldar tekjur að ræða og þær þurfa ekki að endurspegla föst laun Árna.

Þá má nefna að fjármagnstekjuskattur er tekinn út fyrir sviga í samantekt Frjálsrar verslunar og því er ekki loku fyrir það skotið að einhver annar en Árni hafi lagt mest til samneyslunnar í fyrra.

Líkt og Vísir greindi frá í fyrra er Árni ásamt fjölskyldu sinni fluttur til Chicago í Bandaríkjunum, þar sem höfuðstöðvar JBT Marel eru. Miðað við útsvarsgreiðslur síðasta árs má áætla að hann hafi þrátt fyrir það þegið laun hér á landi.

Samkvæmt Tekjublaðinu var Eldur Ólafsson, stofnandi og forstjóri Amaroq Minerals, næstlaunahæstur Íslendinga í fyrra, með 39,5 milljónir króna á mánuði. Þá hafi Gunnar Guðlaugsson, forstjóri Norðuráls, verið þriðji launahæstur með 33,5 milljónir króna á mánuði.

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2025 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2024 sem var greiddur árið 2025.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Tekjur JBT Marel Skattar, tollar og gjöld


Mest lesið


Fleiri fréttir

Sjá meira


×

Mest lesið