Dreymir um að halda næstu Kaleo-tónleika á Vest­fjörðum

Kaleo stóð fyrir tónleikunum Bergmál núna í sumar á Þingvöllum. Tónleikarnir voru afar vel heppnaðir að mati Jökuls og Davíðs Antonssonar, trommara Kaleo, sem voru í viðtali hjá Ívari Guðmundssyni á Bylgjunni.

„Aðdragandinn var búinn að vera svo langur og það var búið að byggjast upp svo mikil spenna svo mér fannst þetta hálfpartinn ótrúlegt á meðan þetta var að gerast,“ segir Davíð.

„Það er svo magnað að fá að vera á þessum stað,“ segir Jökull. 

„Áður en við spiluðum um kvöldið labbaði ég í gegnum mannfjöldann yfir á litla sviðið og það var svo gaman að sjá fjölskyldurnar saman og krakkana. Þetta var markmiðið mitt að fá Íslendinga til þess að koma sér saman og upplifa menningu í þessum fræga þjóðgarði.“

Vilji hvetja fólk til að ferðast um landið

Aðspurðir hvað væri á döfinni á næsta ári segir Jökull sig dreyma um að halda tónleika á öllum landsfjórðungunum.

„Það stóð aldrei til að taka svona langa pásu á Íslandi. Við vorum byrjaðir að skipuleggja stóra tónleika en svo kom Covid og seinkaði öllu. Okkur langar að spila meira hérna og vera meira heima,“ segir Davíð.

„Við finnum mikið fyrir því hvað fólk kann vel að meta þetta. Minn draumur eins og er er að spila á öllum landsfjórðungunum. Að fara um landið og mig langar að fara vestur næst,“ segir Jökull

„Eins og ég segi voru Þingvellir algjörlega einstakir en það var opnað inn og svo lokað. Við værum meira til í að stimpla inn á einhverja upplifun í nokkra daga og ef við erum að fara alla leið vestur að hvetja fólk til þess að nýta ferðina og heimsækja Vestfirði, kynna sér svæðið og kannski stoppa í einhverja daga og ferðast.“

Hann tekur undir að Vestfirðir séu algjörlega einstakir staðir og bætir við að hann hafi sjálfur ferðast þar um á Covid-tímum.

„Þjóðarstoltið er mjög sterkt hjá okkur og það eru algjör fríðindi að geta haldið viðburði eins og þess á heimavelli.“