Veldi auðugustu konu Rúss­lands sagt riða til falls

Ástæðan er sú að Úkraínumenn hafa verið duglegir við að gera loftárásir á vöruhús Wildberries. Samkvæmt umfjöllun New York Times um Tatíönu hafa þeir nú ráðist á minnst 23 starfstöðvar fyrirtækisins síðan um miðjan júlí. Níu starfsmenn hafa látið lífið og ansi mikill varningur brunnið til kaldra kola.

Þá er Wildberries sagt hafa, vegna árásanna, hafa misst um einn þriðja af landi sínu sem lagt er undir vöruhús, og tapað varningi sem hleypur á 480 milljarða rúblna, sem jafngildir á núvirði um 720 milljörðum íslenskra króna.

Af hverju þessi aðferð?

Þessi taktík Úkraínumanna, að herja sérstaklega á þetta eina einkarekna fyrirtæki sem er sagt bera ábyrgð á tíu prósentum allrar smásölu Rússlands, er sögð framkvæmd með það að markmiði að óánægja með stríðið aukist á meðal Rússa, og að það muni setja pressu á Vladímír Pútín Rússlandsforseta um að binda endi á stríðið.

Auk þess hefur Wildberries verið að senda vistir til rússneskra hermanna. Úkraínumenn halda því fram að fyrirtækið flytji hernaðargögn áleiðis á vígstöðvarnar, líkt og varahluti í dróna sem notaðir eru í stríðinu. Samkvæmt reglum fyrirtækisins er slíkt bannað.

Sjálf hefur Tatíana lýst umræddum hernaði Úkraínumanna sem hryðjuverkaárásum. Hún segir að með þessu sé verið að ráðast á saklaust fólk.

Erfið uppbygging framundan

Samkvæmt New York Times veltur framtíð Wildberries nú á því hversu lengi þessar árásir munu standa yfir, og hversu vel og fljótt fyrirtækinu muni takast að aðlagast nýjum veruleika.

Þá muni samband Tatíönu við rússnesk stjórnvöld skipta máli við enduruppbyggingu félagsins.

Önnur áskorun Wildberries er sú, að nú streyma viðskiptavinir þeirra yfir til Ozon, næst stærsta fyrirtækisins á þessum markaði, sem hefur ekki orðið fyrir árásum Úkraínumanna.

Lygileg barátta við eiginmanninn

Líkt og áður segir stofnaði Tatíana Kim Wildberries þegar hún var ung að árum. Fyrirtækið mun fljótlega hafa orðið mikilvægur hluti af rússneska efnahagnum. Innrás Rússa í Úkraínu hafi þá aukið mikilvægi félagsins enn meira, enda lokuðu margir markaðir vesturlanda á viðskipti við Rússa.

Í umfjöllun New York Times segir að núverandi barátta Tatíönu sé hennar erfiðasti bardagi hingað til. Hún hefur þó lent í klandri áður.

Fyrrverandi eiginmaður og barnsfaðir sjö barna hennar, Vladíslav Bakaltjúkk, tók víst mikinn þátt í uppbyggingu Wildberries. En baráttan um fyrirtækið var erfið.

Árið 2024 mun hann hafa farið í höfuðstöðvar Wildberries, ásamt hópi vopnaðra Téténa, og úr orðið skotárás þar sem tveir létust og sjö særðust.

Í kjölfarið tók Tatíana, sem hafði þá um langa hríð borið eftirnafn eiginmannsins, aftur upp nafn foreldra sinna, Kim. Þau skildu svo ári síðar.