Gylfi ó­sáttur: „Ó­trú­leg á­kvörðun hjá KSÍ“

„Við vorum svolítið sprungnar. Við spiluðum síðdegis á laugardegi og fengum aðeins tvo daga á milli leikja,“ sagði Gylfi eftir leik.

Hann gagnrýndi harðlega þá ákvörðun að liðið skyldi þurfa að spila deildarleikinn á þriðjudegi eftir undanúrslitaleik um helgina.

„Mér finnst það ótrúleg ákvörðun hjá KSÍ að setja undanúrslitaleik á laugardag og neyða okkur síðan til að spila á þriðjudegi. Mér finnst ótrúlegt að leikurinn hafi ekki verið færður yfir á miðvikudag.“

Gylfi var einnig ósáttur við að það hefði verið undir Stjörnunni komið hvort breyting á leikdegi yrði samþykkt.

„Af hverju ætti Stjarnan að samþykkja að gefa okkur einn aukadag í hvíld þegar þær þurfa ekki á því að halda? Það er margt sem ég tel að þurfi að breyta.“

Grindavík/Njarðvík átti góða kafla í leiknum, en þegar leið á tók Stjarnan að færa sig framar á völlinn.

„Mér fannst Stjarnan liggja aðeins á okkur undir lokin. Þá fannst mér við ekki eiga mikið meira inni.“

Þjálfarinn var engu að síður afar ánægður með fyrstu 60 til 70 mínútur leiksins og taldi sína leikmenn hafa átt að vera komna í betri stöðu.

„Ég er ótrúlega ánægður með fyrstu 60 til 70 mínúturnar. Mér fannst frekar að við hefðum átt að gera betur þar og vera komnar yfir miklu fyrr.“

„Að mínu mati hefðum við átt að vera búnar að koma okkur í þægilega stöðu eftir klukkutíma leik. Þannig upplifði ég leikinn.“

Nú tekur við kærkomið hlé hjá liðinu um verslunarmannahelgina áður en undirbúningur hefst fyrir næsta verkefni.

„Það er frí um helgina. Við hittumst síðan aftur eftir helgi og byrjum að undirbúa næsta leik. Það er ágætt að fá þetta hlé og leikmenn geta nýtt það eins og þær vilja.“