Breytingar við Leifs­stöð: Renna komumegin líka og gjaldfrjáls hálf­tími

Í fréttatilkynningu þess efnis frá Isavia segir að síðustu mánuði hafi miklar framkvæmdir staðið yfir á bílastæðunum þeim megin þar sem komufarþegar koma út úr flugstöðinni. Því verkefni muni senn ljúka og öll aðstaðan þar verði mikið bætt fyrir farþega og alla þá sem sækja þjónustu eða veita hana við flugstöðina.

Búið sé að byggja yfir helstu gönguleiðir á svæðinu. Farþegar séu þannig varðir fyrir veðri og vindum á leið sinni að eða frá þeim samgönguleiðum sem þeir hafa valið.

Þá hafi rennu verið komið fyrir vestast á P2 þar sem hægt sé að sækja farþega með sama hætti og þeim er skutlað í flug um rennuna hinum megin. Sömu reglur gildi í þessari rennu upp við flugstöðvarbygginguna og brottfararmegin, það er að segja að fimm mínútur séu gjaldfrjálsar, til að tryggja óhindrað flæði. 

Þurfi bílstjórar lengri tíma til að sækja farþega sé gjaldfrjálst í hálfa klukkustund innan hvers sólahrings á komubílastæðunum þannig að ekki þurfi að hafa sérstakar áhyggjur af því hvað tímanum líður. Áður var stundurfjórðungur gjaldfrjáls á komustæðinu.

Á næstu vikum verði framkvæmdum á komubílastæðunum að mestu lokið og nýjar og skýrar merkingar komnar upp.