Gunn­laugur Árni íþróttakarl ársins í LSU

Þessi mikla nafnbót þarf ekki að koma á óvart eftir að Gunnlaugur Árni afrekaði það meðal annars, enn aðeins tvítugur, að komast inn á sjálft Opna bandaríska mótið í sumar, fyrstur íslenskra karla.

Hann var að ljúka sínu öðru ári í LSU og var einn sex íþróttamanna sem tilnefndir voru sem íþróttkarl ársins hjá þessum virta skóla. Hinir komu úr körfubolta, sundi, tennis, frjálsum íþróttum og amerískum fótbolta.

Samkvæmt yfirliti GSÍ lék Gunnlaugur Árni 31 keppnishring fyrir LSU á tímabilinu og var meðalskor hans 70,39 högg. Það er sjöunda lægsta meðalskor sem leikmaður LSU hefur náð á einu tímabili. Hann lék 20 hringi á pari eða betur og þar af 15 hringi undir 70 höggum.

Bestum árangri náði Gunnlaugur Árni þegar hann gerði sér lítið fyrir og vann Fallen Oak Invitational-mótið í október og þá varð hann einnig í 2. sæti á öðru móti; Jackson T. Stephens Cup.

Gunnlaugur Árni lék einnig á NCAA-meistaramótinu þar sem hann var magnaður á seinni tveimur hringjunum og endaði í 32. sæti, eftir að hafa spilað seinni 36 holurnar á -7 höggum.

Þá var hann í sigurliði heimsliðsins gegn Bandaríkjunum á Arnold Palmer Cup fyrir skömmu.

LSU hefur alið af sér íþróttafólk á borð við körfuboltamanninn Shaquille O‘Neal og stangastökkvarann Mondo Duplantis. Fjórtán núverandi eða fyrrverandi íþróttamenn skólans tóku þátt á Ólympíuleikunum í París 2024 og unnu samtals átta verðlaun, þar af þrenn gullverðlaun.