Matthías kominn á áfangaheimili

Að meðtöldu gæsluvarðhaldi frá mars 2025 hefur hinn tvítugi Matthías Björn Erlingsson þegar setið rúmlega ár af tólf ára fangelsisvist samkvæmt dómi Landsréttar, sem mildaði fjórtán ára dóm héraðsdóms yfir honum niður í tólf ár. Hann var sakfelldur ásamt þeim Stefáni Blackburn og Lúkasi Geir Ingvasyni fyrir að hafa myrt hinn 65 ára Hjörleif Hauk Guðmundsson hinn 10. mars 2025.

Verjandi Matthíasar, Sævar Þór Jónsson, staðfestir í samtali við fréttastofu að Matthías hafi farið á Vernd hinn 29. júní en DV greindi fyrst frá málinu með vísan í sínar heimildir.

Þetta sé meðal annars gert vegna þess að hann sé ungur að árum og ekki með frekari sakaferil að baki.

„Hlutfallstíminn er náttúrulega í samræmi við það, þannig að þetta er í raun og veru bara hans réttur og það eru til mörg dæmi um þetta, sérstaklega varðandi unga afbrotamenn.“

Hann gangi þó ekki frjáls.

„Það er auðvitað fylgst með honum og hann þarf að uppfylla ákveðin skilyrði, verandi í þessu úrræði, sem er náttúrulega bara til þess gert að reyna að byggja hann upp og koma honum aftur inn í samfélagið.“

„Eitt af þeim skilyrðum er að hann þarf að sinna vinnu og vera til staðar, á ákveðnum tíma og ákveðnum stað.“

Einstaklingur sem dvelur á áfangaheimili Verndar skal, samkvæmt upplýsingum á vef Fangelsismálastofnunar, dvelja á áfangaheimilinu milli kl. 23–7 alla daga vikunnar. Þar að auki skal hann vera á heimilinu milli kl. 18–19 virka daga og fylgja öllum húsreglum sem þar gilda. Jafnframt ber þeim sem þar búa að stunda vinnu, nám, starfsþjálfun eða meðferð sem forsvarsmenn Verndar hafa samþykkt.

Sævar kveðst ekki geta sagt til um það hvort hinir tveir sakborningarnir, Stefán Blackburn og Lúkas Geir Ingvarsson, sem einnig voru sakfelldir í málinu, fái svipaða meðferð. Hann ítrekar aftur á móti að til þess að komast inn á Vernd þurfi maður að vera með stuttan sakaferil, en hinir tveir hafa báðir fleiri dóma á bakinu.

„Ég get ekki sagt til um hina sakborningana vegna þess að ég veit voða lítið um þeirra stöðu. Nú eru þeir búnir að áfrýja þessum dómi til Hæstaréttar og við vitum ekkert hver niðurstaðan af því verður,“ segir Sævar.

„En allir þeir sem eru að afplána á Íslandi geta auðvitað sótt um svona úrræði en svo er það bara spurningin hvort þeir uppfylli þau skilyrði sem sett eru fyrir því og það fer eftir þyngd dóma.“