Hitinn náði yfir tuttugu stig

„Veðrið hefur verið svolítið tvískipt. Blíða hérna hjá okkur fyrir sunnan og vestanlands. Veðrið er almennt bjart og hlýtt, hitinn er búinn að ná yfir tuttugu stig á tveimur stöðum,“ segir Eiríkur Örn Jóhannesson, veðurfræðingur hjá Veðurstofu Íslands.

Á Austur- og Norðurlandi hefur hins vegar verið þungbúið og útvæta. Hitinn er í kringum sex til ellefu stig.

„Það gæti svo sem enn þá náð einhverjum toppum, eitthvað örlítið hærra, en það fer að verða ólíklegra er líður á daginn,“ segir Eiríkur.

Veðurspáin fyrir helgina líti vel út en búast má við fremur hægum vindi á öllu landinu og bjartviðri. 

„Það birtir til fyrir austan og ætti svona að vera þokkalega gott á öllu landinu en útlit er fyrir svona þokuloft við ströndina víða.“