Ný bók frá Kirkegaard 47 árum eftir dauða hans

Danska ríkisútvarpið greinir frá þessu en danski útgáfurisinn Gyldendal gefur út nýju bókina. Óklárað handrit bókarinnar sem heitir Kalle og Kaptajn Skipper eða Kalli og Kapteinn Skipper fannst í skúffu Kirkegaard fyrir 35 árum síðan en hann hafði þá verið látinn í rúm tíu ár. 

„Ég held að mamma hafi fundið það þegar hún var að þrífa húsið. Hún hugsaði að ef einhver gæti lokið við bókina þá yrði það að vera ég,“ segir Nana Bang Kirkegaard um bókina á vefsíðu Gyldendal.

Kirkegaard er einn ástsælasti barnabókahöfundur Norðurlanda og skrifaði fjölmargar klassískar sögur á borð við Gúmmí-Tarzan, Ottó nashyrning og Fúsa froskagleypi. 

Hann lést aðeins 39 ára gamall eitt vetrarkvöld í mars 1979 eftir að hafa drukkið ótæpilega, hrasað í snjónum og frosið til dauða á staðnum. Sjö verk Kirkegaard hafa komið út eftir andlát hans og nú bætist það áttunda við.

Bókin Kalli og Kapteinn Skipper fjallar um unga drenginn Kalla sem býr í litlu sjávarplássi og dreymir um að sigla um höfin sjö. Einn daginn siglir skipið Esmeralda í höfn en skipstjóri þess er Kapteinn Skipper. Kalli litli laumar sér um borð og við tekur ævintýri á sjónum.

Nana Kirkegaard lýsir sögunni sem hægri, myndrænni og einfaldri.  „Ég held að það sé mjög mikilvægt í barnaheimi þar sem þarf að fylgjast með svo mörgum hlutum,“ sagði hún um bókina.

Auk þess að ljúka við bókina þá er Nana upptekin við að spila tónlist fyrir börn með hljómsveit sinni Skrallebang, sem hún er með manni sínum í, en tónlist hennar er mjög innblásin af textum Ole Lund.