Kalla rúss­neska sendi­herra á teppið vegna hótana

Talskona utanríkisráðuneytis ESB segir að hótanir í garð erlendra borgara og erindreka sem ætlað sé að fá þá til að yfirgefa Kænugarð séu óásættanleg stigmögnun. Þess vegna hafi sendiherrann verið kallaður á teppið.

Hún segir einnig að þeim skilaboðum hafi verið komið áleiðis til hans að Rússar hætti árásum á borgaraleg skotmörk og hefji raunverulegar friðarviðræður, sem geti byrjað á almennu vopnahléi.

Þetta fylgir á hæla þess að í gær sendi utanríkisráðuneyti Rússlands út yfirlýsingu um að vegna árása Úkraínumanna á óbreytta borgara í Rússlandi, myndu Rússar gera árásir á hergagnaframleiðendur í Kænugarði.

Erlendir erindrekar ættu að koma sér frá borginni.

Í kjölfarið hringdi Sergei Lavrov, utanríkisráðherra Rússlands, í Marco Rubio, kollega sinn í Bandaríkjunum, og sagði að Rússar myndu hefja kerfisbundnar árásir á Kænugarð.

Flestir erlendir erindrekar í Kænugarði, og þar á meðal kínverskir, segjast ekki ætla að yfirgefa Kænugarð. Sendiherra ESB í Kænugarði sagði Rússa vilja skapa ótta og óreiðu og einangra Úkraínumenn.

Dmitry Medvedev, fyrrverandi forseti Rússlands og núverandi aðstoðarformaður þjóðaröryggisráðs Rússlands, sagði í dag að Evrópusambandið ætti greinlega nóg af erindrekum og það þyrfti að fækka þeim.

Þjóðverjar kölluðu sendiherra Rússlands þar í landi einnig á teppið. Í yfirlýsingu frá utanríkisráðuneyti Þýskalands segir að árásir Rússa á sjúkrahús, skóla og þýsk sjónvarpsfyrirtæki, auk ógnana gegn þýskum erindrekum, séu hótanir, hryðjuverk og stigmögnun.

Úkraínumenn segja að Rússar hafi skotið rúmlega áttatíu eldflaugum að Kænugarði og nærliggjandi bæjum og borgum um helgina, auk fjölda sjálfsprengidróna. Meðal annars notuðust þeir við Oreshnik-skotflaug sem hönnuð er til að bera kjarnorkuvopn. Hún fer hátt til himins og fellur á gífurlegum hraða til jarðar. Á leiðinni dreifir hún sprengjum frá sér.

Án kjarnorkuvopna er skotflaugin tiltölulega ónákvæm.

Sjá einnig: Hóta frekari árásum og hvetja sendifulltrúa til að flýja Kænugarð

Politico segir erindreka frá rúmlega sjötíu ríkjum hafa í gær farið með utanríkisráðherra Úkraínu og skaðað byggingar sem urðu fyrir árásum um helgina.

Þessar árásir segja Rússar gerðar sem svar við árás Úkraínumanna á heimavist í Starobilsk, hernumdu svæði í Lúhansk-héraði. Rússar segja 21 á aldrinum átján til 21. hafa fallið í árásinni.

Úkraínumenn segjast hafa gert árás á hernaðarlegt skotmark.