Hyggja á hóteluppbyggingu á milli Hvera­gerðis og Sel­foss

Í fréttatilkynningu þess efnis segir að Hótel Hjarðarból sé rekið af eigendum jarðarinnar, hjónunum Sigríði Helgu Sveinsdóttur og Guðbrandi Sigurðssyni. Að þeirra sögn hafi eftirspurn eftir vistvænni gistingu aukist verulega á síðustu árum og þau telji tækifæri felast í frekari uppbyggingu í Ölfusi.

„Við höfum séð mikla breytingu á ferðaþjónustunni undanfarin ár þar sem sífellt fleiri ferðamenn sækja í rólegra umhverfi og nálægð við náttúruna, utan stærstu þéttbýliskjarna landsins,“ er haft eftir Guðbrandi.

Nýta vind og heitt vatn

Áformin geri ráð fyrir nýju hóteli ásamt frekari uppbyggingu tengdri ferðaþjónustu. Meðal þess sem horft er til í verkefninu séu lausnir tengdar vindorku, nýtingu heits vatns og uppbyggingu hleðslustöðva fyrir ferðamenn. Samkvæmt eigendunum verði lögð rík áhersla á sjálfbærni í allri uppbyggingu verkefnisins.

„Við viljum halda áfram að þróa Hjarðarból með ábyrgum hætti og sjáum mikil tækifæri í sjálfbærri ferðaþjónustu á svæðinu. Hugmyndirnar hafa þegar verið teiknaðar upp og nú leitum við að aðilum sem hafa áhuga á að koma að verkefninu með okkur,“ er haft eftir Sigríði.

Á jörðinni sé einkavatnsveita sem hjónin hafi sjálf byggð fyrir reksturinn, en haft er eftir þeim að mikilvægt sé að halda vel utan um innviði á svæðinu enda fylgi því ákveðin ábyrgð að reka þjónustu á landsbyggðinni.

Staðsetningin hafi reynst vel

„Við höfum alltaf lagt áherslu á að vanda til verka og byggja upp starfsemi sem fellur vel að umhverfinu. Það skiptir okkur miklu máli að þeir gestir sem hingað koma upplifi bæði góða þjónustu og þá náttúru sem svæðið hefur upp á að bjóða,“ er haft eftir Guðbrandi.

Hótelið hafi frá upphafi tekið á móti ferðamönnum af fjölmörgum þjóðernum auk skólahópa og annarra ferðahópa sem sækja í gistingu í grennd við helstu ferðamannastaði Suðurlands. Að sögn hjónanna hafi staðsetning Hjarðarbóls reynst vel, bæði vegna nálægðar við þjónustu og vegna þeirrar kyrrðar sem svæðið bjóði upp á.