Skilur pirring stuðnings­manna út í fyrirliðann

Romero er meiddur en hefur vakið mikið umtal með ferðalagi sínu til Argentínu. Hann flaug þangað í einkaþotu með fjölskyldu sinni fyrr í vikunni og sást síðan á æfingasvæði uppeldisfélags síns Belgrano í gær.

Í stað þess að vera viðstaddur fallslag Tottenham gegn Everton í lokaumferð ensku úrvalsdeildarinnar á sunnudag verður Romero á leik Belgrano gegn River Plate í lokaumferð argentínsku deildarinnar. Forseti Belgrano staðfesti fyrr í dag að Romero myndi sitja sér við hlið í stúkunni.

Tottenham er tveimur stigum frá fallsvæðinu og mætir Everton í lokaumferðinni. West Ham er þar fyrir neðan og mætir Leeds í lokaumferðinni.

„Hann talaði við læknateymið og þau ákváðu í sameiningu að hann myndi klára endurhæfinguna eftir meiðslin í Argentínu,“ sagði Roberto De Zerbi á blaðamannafundi í dag.

De Zerbi sagði þá Romero hafa átt gott spjall í síðustu viku. Þjálfarinn setti ekkert út á að Romero færi til Argentínu en þar mun hann dvelja þar til argentínska landsliðið kemur saman í æfingabúðir fyrir HM.

De Zerbi sagði fjarveru hans ekki skipta neinu máli en sýndi pirruðum stuðningsmönnum liðsins skilning.

„Hann mun ekki breyta neinu, hvort sem hann væri á vellinum eða ekki… Leiðtogar eru mismunandi. Ben Davies talaði við mig fyrr í dag og spurði hvort hann mætti vera með okkur fram að leik. Við munum gista á hóteli á morgun og hann vildi vera með liðsfélögunum fyrir leikinn. Romero er hins vegar að undirbúa sig fyrir HM og að jafna sig af meiðslum.“