Svona verður lokaumferðin í enska boltanum á Sýn Sport

Allir tíu leikirnir verða í beinni útsendingu á rásum Sýnar Sport. Þá er hægt að fylgjast með öllum tíu samtímis í Doc Zone á Sýn Sport þar sem skipt verður á milli valla og fylgst með hvaða áhrif staða hvers leiks fyrir sig hefur á stöðuna í deildinni.

Leikur Manchester United við Brighton er undanskildur Sportrásunum. Hann verður sýndur á Sýn í opinni dagskrá á sunnudaginn klukkan 15:00.

Hver er staðan í deildinni?

Baráttunni um enska meistaratitilinn lauk í vikunni með misstigi Manchester City og titillinn Arsenal vís. Enn er þó barist á botni og í Evrópubaráttunni.

Enn er ekki víst hvort fimm eða sex ensk lið fari í Meistaradeild Evrópu á næstu leiktíð. Chelsea berst fyrir því að spila í Evrópu yfirhöfuð og Liverpool hefur ekki tryggt sæti sitt í Meistaradeildinni.

Liverpool situr í fimmta sæti, neðsta Meistaradeildarsætinu, og til að fráfarandi Englandsmeistarar fari ekki í keppnina að ári þarf það að tapa stórt fyrir Brentford og Bournemouth að vinna stórt gegn Nottingham Forest. Um verður að ræða kveðjuleik Mohamed Salah á Anfield.

Evrópusætin verða átta eða níu

Vinni Liverpool sinn leik fer liðið upp fyrir Aston Villa í fjórða sæti deildarinnar, EF Aston Villa tapar fyrir Manchester City í það sem verður kveðjuleikur Pep Guardiola. Liverpool er þremur stigum frá Villa og með betri markatölu.

Fari það svo að Aston Villa detti niður í fimmta sæti mun sjötta sæti deildarinnar verða Meistaradeildarsæti vegna sigurs Aston Villa í Evrópudeildinni. Þá fer annað hvort Bournemouth eða Brighton í Meistaradeildina. Brighton þarf að vinna Manchester United og treysta á tap Bournemouth fyrir Forest.

Sem stendur eru sjötta og sjöunda sætið Evrópudeildarsæti og áttunda sætið fer í Sambandsdeild Evrópu. Chelsea situr sem stendur í áttunda sætinu með 52 stig, sama og Brentford í því níunda og Sunderland er með 51 í 10. sæti.

Ef Aston Villa endar í fimmta sætinu færast þessi sæti niður; sjöunda og áttunda sæti fara í Evrópudeild og það níunda í Sambandsdeildina. Chelsea getur enn misst af því að spila yfirhöfuð í Evrópu á næsta ári, ef liðið tapar í sex stiga leik við Sunderland.

Fellur Tottenham eða West Ham?

Þá kemur í ljós hvort Tottenham eða West Ham fellur úr ensku úrvalsdeildinni.

Tottenham dugar stig gegn Everton þó aðeins tvö stig aðskilji Spurs og West Ham þar sem Tottenham er með tólf mörkum betri markatölu. West Ham þyrfti því að vinna tólf marka sigur á Leeds United til að halda sæti sínu ef Tottenham fær stig.

Sigur heldur Spurs uppi og fellir West Ham sama hvað en vinni West Ham Leeds og Tottenham tapi fyrir Everton fara þeir hvítklæddu í B-deildina.

Líkt og segir að ofan verða allir tíu leikirnir í beinni á rásum Sýnar Sport og allir á sama tíma í Doc Zone. Niðurröðun þeirra má sjá að neðan.

Lokaumferð enska boltans á sunnudag á Sýn Sport

• 14:40 Doc Zone (Sýn Sport)
• 15:00 Manchester City – Aston Villa (Sýn Sport 2)
• 15:00 Crystal Palace – Arsenal (Sýn Sport 3)
• 15:00 Liverpool – Brentford (Sýn Sport 4)
• 15:00 Tottenham – Everton (Sýn Sport 5)
• 15:00 Sunderland – Chelsea (Sýn Sport 6)
• 15:00 Manchester United – Brighton (Sýn)
• 15:00 Burnley – Wolves (Sýn Sport Ísland)
• 15:00 Fulham – Newcastle (Sýn Sport Ísland 2)
• 15:00 Nott. Forest – Bournemouth (Sýn Sport Ísland 3)
• 15:00 West Ham – Leeds (Sýn Sport Ísland 4)
• 20:00 Sunnudagsmessan (Sýn Sport)