Gagn­rýnir Körfuboltakvöld: Sam­þykkja svona hegðun og af­vega­leiða um­ræðuna

DeAndre Kane, stjörnuleikmaður Grindavíkur, sendi stuðningsfólki Tindastóls ítrekað fokkjúmerki, strax eftir leik, samhliða því sem hann fagnaði með eigin stuðningsmönnum sem einnig fjölmenntu í Síkið, þar sem Grindavík vann á endanum 86-83 í æsispennandi leik og er komið 2-0 yfir í einvíginu. 

Björgvin Páll segist elska að fylgjast með körfuboltanum sem og DeAndre Kane þegar að hann spilar, enda sé Kane litríkur og skemmtilegur karakter. 

„Sem og frábær körfuboltamaður. En hérna finnst mér menn vera á villigötum. Einn stærsti prófíllinn í íslenskum körfubolta ákveður að senda fokkjúmerki uppí stúku og einn sérfræðingur þáttarins talar um í þessu samhengi að menn megi ekki missa sjónar á því sem skipti mestu máli, að vinna körfuboltaleiki,“ skrifar Björgvin í færslu á Bónus spjallinu á Facebook og vísar í ummæli Sævars Sævarssonar í Körfuboltakvöldi í gær: 

„Við höfum hundrað sinnum séð einhverja stæla og eitthvað svona eiga sér stað,“ sagði Sævar. „Þetta er auðvitað algjör óþarfi hjá Kane og auðvitað á hann bara að sleppa þessu en menn verða bara að halda haus. Mega ekki missa sjónar á því sem skiptir mestu máli og það er að vinna körfuboltaleiki.

Afvegaleiða umræðuna

Björgvin segir margt mikilvægara en að vinna íþróttaleiki.

„Fyrir mér er líka mikill munur á því að vera erfiður eða með stæla inni á vellinum og að senda fokkjúmerki upp í stúku í átt að fólki á aldrinum 3-83 ára. Leikmenn eru fyrirmyndir og leikmenn gera mistök en þegar þeir sem fjalla um sportið eru farnir að nánast samþykkja svona hegðun og afvegaleiða umræðuna með því að færa fókusinn á hitt liðið þá er kominn tími á að bakka eitt skref. Meiri standard og fagmennsku takk.“