Grát­legt tap hjá Bjarka í vítakastkeppni

Veszprém vann fyrri leikinn með einu marki en tapaði 31-30 í kvöld eftir æsispennandi leik. Reglum samkvæmt var ekki framlengt heldur haldið beint í vítakastkeppni.

Þar byrjaði Hugo Descat á því að klúðra víti fyrir Veszprém. Bjarki Már skoraði svo úr öðru víti Veszprém en Nedim Remili klúðraði því þriðja.

Þá dugði lítils þegar Hákun West Av Teigum klikkaði á þriðja víti Fuchse, heimamenn í Berlín skoruðu úr hinum fjórum vítunum og fóru áfram.

Mathias Gidsel var maðurinn sem tryggði sætið í undanúrslitum með síðasta vítakastinu en hann var líka markahæstur í leiknum með 10 mörk.

Bjarki Már komst ekki á blað í leiknum sjálfum en Hugo Descat og Ahmed Moham voru markahæstir hjá Veszprém með 7 mörk.

Aalborg-Sporting, Barcelona-Nantes og Magdeburg-Pick Szeged berjast um hin lausu sætin í Final Four úrslitahelgi Meistaradeildarinnar.