Slot við Hjörvar: „Ég held að öllum hafi liðið þannig“

Liverpool lenti 2-0 undir í fyrri hálfleik en jafnaði metin í þeim seinni áður en Kobbie Mainoo skoraði sigurmark United á 77. mínútu. Hjörvar spurði Slot út í muninn á Liverpool í upphafi fyrri og seinni hálfleiks.

„Byrjuðum við hægt? Við byrjuðum mun hraðar í seinni hálfleik, það er á hreinu. En það hjálpar aldrei til að fá á sig mark úr föstu leikatriði svona snemma leiks, sérstaklega á útivelli þar sem stuðningsmennirnir komast þá í gírinn.

Eftir að við fengum á okkur fyrsta markið þá héldum við boltanum og höfðum stjórn, án stórra færa, en svo misstum við boltann með einföldum hætti á miðjunni og þar liggur einn þeirra helsti styrkleiki. Þeir hafa marga [styrkleika] en einn þeirra er skyndisóknirnar. Út fyrri hálfleikinn vorum við svo með boltann án þess þó í raun að skapa færi.

Ég sagði þeim að við þyrftum alls ekki að tapa þessum leik ef við næðum að koma inn marki – gera hlutina af aðeins meiri ákveðni og krafti. Það sýndum við í seinni hálfleiknum,“ sagði Slot en viðtalið við hann má sjá hér að ofan. Mörkin úr leiknum má sjá hér að neðan.

Hjörvar sagði að svo virtist sem að oft kæmi sigurmark í lok leikja hjá Liverpool, annað hvort hjá Liverpool eða andstæðingnum, því það væri allt lagt í sölurnar. Slot hlyti að hafa liðið eins og að Liverpool myndi ná að landa sigrinum:

„Ég held að öllum hafi liðið þannig. Eftir að við jöfnuðum í 2-2 þá héldum við áfram að þrýsta og þrýsta á þá. Líkt og mestallan leikinn þá héldum við líka boltanum betur, og komumst alltaf nær og nær því að skora, en eins og svo oft á þessari leiktíð þá slökktum við á okkur á einu augnabliki. Og eins og alltaf á þessari leiktíð þá leiddi það strax til þess að við fengum á okkur mark. Við vorum þá 3-2 undir og reyndum áfram eftir þetta en náðum ekki að jafna,“ sagði Slot en nánar er rætt við hann í viðtalinu hér að ofan.