„Þetta er smá spooky“

Frank Aron Booker fór meiddur af velli snemma leiks í sigri Vals á Grindavík á Hlíðarenda síðustu helgi. Hann braut hnéskel og spilar ekki körfubolta næsta misserið eða svo.

Kristófer segir söknuð af Frank en meiðslin séu tækifæri fyrir aðra að stíga upp, líkt og þeir Igor Maric og Hjálmar Stefánsson gerðu eftir meiðsli Franks í síðasta leik.

„Það er náttúrulega gríðarlegt högg fyrir okkur að missa hann. Hann gerir gríðarlega mikið fyrir okkur bæði varnarlega og sóknarlega. Við munum sakna hans. En það er tækifæri fyrir aðra að stíga upp,“

„Við sáum það að Igor og Hjálmar voru stórir fyrir okkur í síðasta leik. Það er leiðinlegt að missa lykilmenn út í úrslitakeppninni, sérstaklega þar sem við vitum að hann mun ekkert koma aftur. Þetta verður aðeins þyngra, en eins og ég segi, aðrir þurfa að stíga upp,“ segir Kristófer.

Frank Aron braut hnéskelina á sama stað í sömu höll gegn sama andstæðingi og liðsfélagi hans Kristófer Acox í oddaleik um Íslandsmeistaratitilinn fyrir tveimur árum síðan. Það tók Kristófer þónokkra mánuði að ná sér góðum af sínum meiðslum.

„Það sem er mest scary við þetta er að þetta gerist á eiginlega nákvæmlega sama stað, í sama húsi á móti sama liði. Þetta er smá spooky. En hann er þannig gæji að hann er alltaf jákvæður og hress og hann hefur þrátt fyrir þessi leiðinlegu meiðsli verið mjög brattur,“

„Við munum alveg finna fyrir honum, þó hann verði ekki á gólfinu. Hann verður mikill orkubolti fyrir okkur á hliðarlínunni og hann mun reyna að gera sitt. En þetta gefur manni aðeins meiri hvatningu að klára þetta fyrir hann,“ segir Kristófer.

Leikur Grindavíkur og Vals er klukkan 19:15 í kvöld. Hann verður sýndur beint á Sýn Sport Ísland og bein útsending hefst klukkan 18:30.