Ráða þrjá í tengslum við stofnun nýs sjóðs

Í fréttatilkynningu þess efnis segir að sjóðir Brunns fjárfesti í sprota- og vaxtarfyrirtækjum á hugmynda-, klak- og vísistigi með það að markmiði að styðja öflug teymi við uppbyggingu alþjóðlegra fyrirtækja frá Íslandi. Meðal fjárfestinga sjóðanna séu félög á borð við Oculis, DTE, Nanitor, Laki Power, AviLabs, Axelyf, Taktikal og Hopp.

Óskar Fannar Vilmundarson hafi nú verið ráðinn fjárfestingastjóri, auk þess sem Einar Þór Gústafsson hafi verið ráðinn fjárfestingastjóri og Pétur Snær Auðunsson greinandi.

Óskar hafi hafið störf hjá Brunni sem greiningaraðili árið 2022 og hafi á þeim fjórum árum komið að sjö nýjum fjárfestingum úr Brunni vaxtarsjóði II og um tuttugu eftirfylgnisfjárfestinga í sjóðum Brunns I og II, auk þátttöku í stofnun Brunns III. Óskar hafi áður starfað hjá lækningavörufyrirtækinu Kerecis, fyrst sem aðstoðarmaður forstjóra og síðar sem verkefnastjóri í rannsóknum og þróun. Hann hafi víðtæka reynslu af hugverkum í nýsköpun og hafi meðal annars borið ábyrgð á alþjóðlegu einkaleyfasafni með yfir 50 skráðum einkaleyfum. Óskar sé með B.Sc. í vélaverkfræði frá Háskólanum í Osló, diplóma í viðskiptahagfræði frá Háskólanum í Tromsø og sé löggiltur verðbréfamiðlari.

Einar Þór komi til Brunns frá Gangverki, þar sem hann hafi leitt vöruþróun í fjármála-, ferða- og heilsutækni fyrir stærri fyrirtæki á Íslandi og í Bandaríkjunum. Einar hafi rúmlega tuttugu ára reynslu af nýsköpun og alþjóðlegum vexti sprotafyrirtækja en hann hafi meðal annars gengt stöðu framkvæmdastjóra vöruþróunar hjá Meniga, tæknistjóra Play og verið einn stofnanda Getlocal ásamt því að sitja í stjórn Símafélagsins og fleiri fyrirtækja. Einar hafi útskrifast frá SAE í New York og sé að leggja lokahönd á Executive MBA með áherslu á stafræna umbreytingu og nýsköpun.

Pétur Snær Auðunsson hefur verið ráðinn greinandi hjá Brunni þar sem hann muni starfa við greiningu fjárfestingarkosta og þátttöku í verkefnum sjóðsins.

Pétur sé með B.Sc. gráðu í fjármálaverkfræði frá Háskólanum í Reykjavík, hafi lokið CFA Level II og sé með verðbréfamiðlararéttindi á Íslandi. Pétur búi yfir fimm ára reynslu á fjármálamarkaði, meðal annars úr áhættustýringu hjá Landsbankanum og Íslandsbanka, auk fyrirtækjaráðgjafar hjá Íslandsbanka. Síðast hafi hann gengt stöðu fjármálastjóra hjá verktakanum Verkeining ehf.

„Við erum afar ánægð með að styrkja teymið okkar með þessum öflugu ráðningum. Óskar hefur sýnt framúrskarandi hæfni frá því hann kom til félagsins og því sérstaklega ánægjulegt að sjá hann taka næsta skref innan Brunns sem fjárfestingastjóri. Einar og Pétur koma jafnframt með dýrmæta reynslu og þekkingu sem mun nýtast vel í okkar vegferð,“ er haft eftir Árna Blöndal, meðstofnanda og fjárfestingastjóra hjá Brunni.

Brunnur Ventures GP hafi verið stofnað af Árna Blöndal og Sigurði Arnljótssyni, sem hafi hvor um sig um 25 ára reynslu af nýsköpun, uppbyggingu fjölda vaxtarfyrirtækja og rekstri vísisjóða. Hjá Brunni Ventures starfa auk þeirra Kolbeinn Björnsson, fjárfestingastjóri.