Lækka vask á elds­neyti og sjá til þess að verðlækkanir skili sér strax

Þetta er hluti aðgerða gegn verðbólgu, sem formenn stjórnarflokkanna kynntu á blaðamannafundi rétt í þessu.

Vilja draga úr áhrifum á heimili og fyrirtæki

Í fréttatilkynningu um aðgerðirnar segir að ríkisstjórnin hafi samþykkt tímabundnar efnahagsaðgerðir til að hemja verðbólgu og bregðast við verðhækkunum á olíu vegna stríðsátaka við Persaflóa. Markmið aðgerðanna sé að fletja út kúfinn vegna þessara hækkana og draga úr áhrifum þeirra á íslensk heimili og fyrirtæki.

Aðgerðirnar séu tímabundnar á meðan mikil óvissa er um þróun mála sem gefi stjórnvöldum færi á að móta langtímaaðgerðir til að bregðast við breyttri stöðu. Með aðgerðunum vilji stjórnvöld leggja sitt af mörkum og setja fordæmi fyrir atvinnulífið til að stemma stigu við verðhækkunum.

Lækka vask og fjölga hleðslustöðum

Aðgerðirnar séu eftirfarandi:

1. Lækkun á dælu

• Með tímabundinni lækkun virðisaukaskatts úr 24% í 11% á eldsneyti af dælu

2. Vöktun á verðlagningu

• Með tímabundnu lagaákvæði sem skyldar söluaðila til að skila verðlækkun að fullu til neytenda og felur Samkeppniseftirlitinu að vakta að þetta sé gert
• Með því að styrkja verðlagseftirlit ASÍ um 15 milljónir til að hafa sérstakt eftirlit í sumar með verðlagningu á öllum helstu tegundum dagvöru og þjónustu

3. Fjölgun hleðslustöðva um land allt

• Með 500 milljóna átaki strax í sumar til að fjölga hleðslustöðvum við fjölbýlishús og gististaði og „loka hleðslugatinu“ hringinn í kringum landið

Gert sé ráð fyrir að aðgerðirnar taki gildi 1. maí og renni út 31. ágúst á þessu ári. Lagafrumvarp um lækkun virðisaukaskatts á dælu og vöktun á verðlagningu verði lagt fram á Alþingi í næstu viku. Fjölgun hleðslustöðva verði styrkt með framlögum úr loftslags- og orkusjóði, sem verði kynnt á næstu dögum.