„Heyrum varla í hvor öðrum“

Arnór Snær Óskarsson, leikmaður Vals, átti góðan leik og var markahæstur með 10 mörk. Hann fór yfir leikinn og var að vonum ánægður með niðurstöðuna.

Hvernig líður þér eftir þennan seiglusigur?

„Ég veit það eiginlega ekki. Við byrjum ógeðslega vel fannst mér, fyrri hálfleikur, vorum bara með þá, svo koma þeir í seinni og ná þarna einhverjum nokkrum í röð og við smá klaufar í sókn, svo kemur bara geðveikin í húsið og við heyrum varla í hvor öðrum og við koðnum aðeins en mér fannst vel gert að missa þetta ekki og landa sigrinum.“

KA tók markmanninn út af og spiluðu sjö á móti sex sóknarlega stóran hluta síðari hálfleiks sem gekk mjög vel og Valsmenn náðu illa að eiga við það.

„Við vissum að þeir myndi einhvertímann fara í það en Bjarni (Ófeigur Valdimarsson) er bara frábær þegar hann fær sinn tíma í að velja, þá er hann sturlaður, enda einn af bestu leikmönnum deildarinnar. Svo fer hann að verja hinu megin í markinu og þá er þetta orðið svakalega erfitt.“

Valur sigraði fyrsta leikinn með 18 marka mun og komst sjö mörkum yfir í fyrri hálfleik og margir sem hugsuðu líklega þá að nú gæti önnur kennslustund átt sér stað.

„Við vorum komnir með fimm og þá bara allt í lagi, reynum að gefa í eins og í síðasta leik og þá kannski brotna þeir, en þeir brotna aldrei hérna í KA heimilinu. Ég er virkilega sáttur að hafa unnið þá hérna.“

„Við komum bara dýrvitlausir í næsta leik, bara eins og það sé 0-0, og ætlum bara að vinna þá þar og vonandi verður þetta bara hörkuleikur“, sagði Arnór að lokum einbeittur á að klára einvígið í næsta leik sem fram fer að Hlíðarenda á mánudaginn kemur.