Gefa íþróttafólki Ólympíubónus sem keppti aldrei á leikunum

Innrás Vladimírs Pútíns í Úkraínu árið 2022 hefur leitt til þess að Rússland hefur verið útilokað frá Ólympíuleikunum. Árin 2024 og 2026 hafa samt einstaka Rússar fengið að taka þátt ef þeir hafa uppfyllt kröfur um að vera ekki hluti af hernum eða öðrum öryggisstofnunum og að þeir hafi ekki stundað áróður fyrir stríðinu.

Nú tilkynnir Ólympíunefnd Rússlands að 116 íþróttamenn fái Ólympíubónus en 103 þeirra voru aldrei á Ólympíuleikum. Samtals fá þeir nokkra tugi milljóna í bónus. Norska ríkisútvarpið fjallar um þetta. 

Allir fá pening

„Við höfum tekið ákvörðun um peningagreiðslu til allra ólympíufara sem gátu ekki farið á leikana vegna pólitískra og sviksamlegra ákvarðana alþjóðlegra samtaka,“ skrifar Mikhail Degtjarjov, íþróttamálaráðherra og formaður Ólympíunefndar Rússlands, á Telegram-rás sinni.

Íþróttamennirnir fá allt að 500.000 rúblur, sem samsvarar um 782 þúsund íslenskum krónum.

„Með þessum hætti styðjum við ekki aðeins þá sem fóru á Ólympíuleikana heldur einnig þá sem gátu ekki farið. Frá okkar sjónarhóli er þetta sanngjarnt,“ er haft eftir Viktor Berezov, framkvæmdastjóra Ólympíunefndar Rússlands, í rússneskum fjölmiðlum.

Hins vegar er óljóst í rússneskum fjölmiðlum hvernig peningunum er skipt. Þeir ganga út frá því að fyrrverandi Ólympíumeistarar, eins og til dæmis skíðagöngukappinn Aleksandr Bolsjúnov, fái peninga sem „Ólympíumeistari“, en ekkert hefur komið fram um hvernig yngri íþróttamenn, sem af eðlilegum ástæðum tóku ekki þátt í leikunum 2022, verði bætt upp fyrir að hafa ekki fengið tækifæri til að sýna styrk sinn.

Eftir Ólympíuleikana í París 2024 greiddi rússneska ríkið peninga til íþróttamanna sem hefðu getað farið á Sumarólympíuleikana. Þá var um að ræða heila 245 íþróttamenn.

Fréttin frá íþróttamálaráðherranum kom í tengslum við að Ólympíuförunum var boðið í móttöku í Moskvu.

Hvað mun gerast?

Í Rússlandi er nánast eilíf umræða um hvað muni gerast með alþjóðlega þátttöku íþróttamanna í framtíðinni. Jelena Välbe, sem enn er ábyrg fyrir skíðagönguhluta skíðaíþróttarinnar, segist hlakka til FIS-þingsins í júní.

„Ég vona að við getum byrjað að snúa aftur. Ég vona að það verði hægt að tala við stjórn og meðlimi FIS. Kannski fáum við að vita hvað þeir hugsa um hvort Rússland verði fulltrúi í alþjóðlegum keppnum,“ sagði Jelena Välbe við Match TV.

Umræðan hefur verið hávær í Rússlandi um hvort Bolsjúnov hefði átt möguleika gegn Johannes Høsflot Klæbo á Ólympíuleikunum en Klæbo tapaði fyrir honum fjórum árum fyrr. Klæbo vann sex gull af sex mögulegum á leikunum í febrúar.

Segja vanta samkeppni

Fleiri, einnig utan Rússlands, vilja sjá einvígið aftur. Aðspurð hvort einhverjar líkur séu á því svarar Välbe:

„Með hliðsjón af því að Alþjóðaólympíunefndin er farin að gefa eftir verða alþjóðlegu samtökin einnig að gera slíkt hið sama. Allar ákvarðanir eru þegar allt kemur til alls að miklu leyti háðar því hvernig Alþjóðaólympíunefndin hagar sér. Núna er mikil gagnrýni á FIS, sérstaklega þegar kemur að skíðagöngu og keppnum karla, þar sem samkeppni vantar. Vegna þessa tapa þeir peningum og styrktaraðilum. Áhorfendur mæta heldur ekki eins oft,“ sagði hún.