Mickelson neyðist til að sleppa Masters

Mickelson sagði frá þessu á Instagram-síðu sinni og sagði ástæðuna vera heilsumál í fjölskyldunni.

Bandaríkjamaðurinn sagði ljóst að hann yrði frá keppni um einhvern tíma. Hann hefur aðeins þrisvar sinnum misst af Masters frá því að hann spilaði fyrst á Augusta National vellinum árið 1991.

„Ég ber rosalega virðingu fyrir Augusta National golfklúbbnum og þetta er án vafa alveg einstök vika á árinu. Ég óska öllum alls hins besta og mun fylgjast með,“ skrifaði Mickelson.

Mickelson, sem er 55 ára gamall, hafði áður misst af fyrstu fjórum mótum ársins á LIV-mótaröðinni og gaf þá einnig upp sömu ástæðu, um heilsumál í fjölskyldunni.

Áður var ljóst að Tiger Woods yrði ekki með á Masters, eftir að hann var handtekinn fyrir að aka undir áhrifum og valda með því bílslysi.

Þar með verður Masters-mótið í ár það fyrsta síðan árið 1994 þar sem hvorki Tiger né Mickelson, sem samtals hafa unnið mótið átta sinnum, verða með.