Völdu til­boð World Class í út­boði sem er aftur í kæru­ferli

Tvö félög sóttust eftir sérleyfissamningi við Vestmannaeyjabæ um að reka og byggja upp heilsurækt við Íþróttamiðstöð Vestmannaeyja, annars vegar World Class og hins vegar Sporthöllin. Þetta var annað útboðið á rekstrinum en kærunefndnefnd ógilti útboð sem var haldið í fyrra.

Bærinn tilkynnti báðum bjóðendum í gær að tilboð World Class hefði orðið fyrir valinu. Það hefði verið samþykkt og bindnandi samningur væri þegar kominn á um það.

Tæplega einu stigi munaði á tilboðum World Class og Sporthallarinnar í stigagjöf útboðsins. World Class fékk fleiri stig fyrir fjölda stöðva sem fyrirtækið rekur og fyrir að vera jafnlaunavottað fyrirtæki. Heildartilboðsverð Sporthallarinnar fékka aftur á móti mun fleiri stig en World Class.

Þeir sem stóðu að tilboði Sporthallarinnar kærðu útboðið í síðustu viku. Vísuðu þeir til ósanngjarnra skilmála útboðsins sem þeir töldu sérsniðið að World Class sem væri eina fyrirtækið í heiminum sem gæti uppfyllt þá. 

Þannig var þess krafist að bjóðendur væru með að minnsta kosti fimm þúsund manns í áskrift og að þeir ættu að minnsta kosti milljarð í eigið fé. Þá var það talið þeim til tekna að reka stöðvar víða um landið. Innan við fimm þúsund manns búa í Vestmannaeyjum.

Fylgdu ekki reglum í fyrra útboði

Þetta var í annað skiptið sem sami hópur kærði útboð Vestmannaeyjabæjar á heilsuræktinni. Kærunefnd útboðsmála ógilti fyrra útboð bæjarins frá því í fyrra á þeim forsendum að hann hefði ekki fylgt úboðsreglum.

Eftir að kæran á upphaflega útboðið kom fram gerði Vestmannaeyjabær bráðabirgðasamning við World Class um að reka heilsuræktina. Fékk fyrirtækið leyfi til þess að byggja við aðstöðina á eigin kostnað. Ákvæði í samningnum við bæinn var þó um að sveitarfélagið þyrfti að endurgreiða fyrirtækinu þann kostnað ef það fengi ekki samninginn.