Rekstur Hörpu stöðugur þrátt fyrir krefjandi að­stæður

Þar af voru 846 tónleikar og aðrir listviðburðir með þátttöku íslenskra og erlendra listamanna. Alls voru afgreiddir 262.000 aðgöngumiðar í miðasölu Hörpu á árinu 2025. Þá var samkvæmt tilkynningu einnig haldinn fjöldi ráðstefna og fagviðburða, alls 471 viðburður. Meðal stærstu alþjóðlegu viðburða ársins voru Hringborð Norðurslóða (Arctic Circle), EVE Fanfest, Reykjavík Global Forum og Reykjavíkurskákmótið.

„Árið 2025 endurspeglar stöðugleika í rekstri Hörpu. Þrátt fyrir krefjandi rekstrarumhverfi höldum við uppi öflugri starfsemi með fjölbreyttu viðburðahaldi og mikilli aðsókn innlendra og erlendra gesta. Harpa er lykilvettvangur menningar og viðburða á Íslandi og gegnir jafnframt mikilvægu hlutverki í samfélagi og atvinnulífi. Hagræn áhrif Hörpu eru einnig veruleg eins og liggur nú fyrir. Við munum halda áfram að styrkja þá stöðu og skapa fjölþætt verðmæti til framtíðar,“ segir Svanhildur Konráðsdóttir forstjóri, í tilkynningu.

Þar kemur fram að tekjur af starfseminni námu 1.838 milljónum króna og heildartekjur með framlögum eigenda 2.472 milljónum króna. Rekstrargjöld námu rúmum 2.300 milljónum króna og hækkuðu um fimm prósent milli ára. Rekstrarhagnaður (EBITDA ) var 171 milljón en tap samstæðunnar nam 138 milljónum króna að teknu tilliti til afskrifta og fjármagnsliða. Afskriftir námu 445 milljónum króna og endurspegla samkvæmt tilkynningu kostnaðinn sem fylgir viðhaldi stórra, tæknilega flókinna menningarinnviða og listaverks á borð við Hörpu. Eigið fé samstæðunnar nam 10.619 milljónum króna og eiginfjárhlutfallið var 29,6 prósent.

Í tilkynningu kemur einnig fram að í fyrra hafi verið undirritaður nýr fimm ára samningur við eigendur Hörpu sem eru íslenska ríkið og Reykjavíkurborg.

Í tilkynningu kemur einnig fram að sjálfbærni sé samofin starfsemi Hörpu og er húsið Svansvottað ráðstefnuhús. Markvisst sé unnið að því að lágmarka umhverfisáhrif og hámarka jákvæð áhrif á samfélag og atvinnulíf. Alls hafi verið 193 viðburðir tileinkaðir barnamenningu. Heildarfjöldi opinna og gjaldfrjálsra viðburða á vegum Hörpu og/eða í samstarfi við aðra á árinu nam 152 og endurspeglar vel áhersluna á samfélagslegt hlutverk hússins.

Fimmtán  ára í ár

„Í vor fagnar Harpa 15 ára afmæli. Að baki eru mikilvæg mótunarár og það er ótrúlegur árangur sem hefur náðst varðandi skilning og viðurkenningu samfélagsins á tækifærunum sem húsið skapar. Það er mikilvægt að finna fleira en það en við megum aldrei sofna á verðinum í samtali okkar við samfélagið og stöðugri leit að tækifærum til að gera betur,“ segir Ingibjörg Ösp Stefánsdóttir, formaður stjórnar Hörpu, í tilkynningunni.

Á árinu fóru einnig fram 162 listviðburðir sérstaklega ætlaðir ferðamönnum, þar af 84 leiksýningar. Þá var í mars í fyrra opnuð eldfjallasýningin Volcano Express. Í tilkynningu segir að á næstu mánuðum verði önnur ný föst upplifunar- og fræðslusýning opnuð sem ber titilinn Heimur íslenskrar tónlistar og mun höfða jafnt til heimamanna sem erlendra gesta.

Ný stjórn Hörpu var kjörin á aðalfundi stjórnar í dag. Ingibjörg Ösp Stefánsdóttir er áfram formaður og voru Árni Geir Pálsson og Ólöf Kristín Sigurðardóttir endurkjörin. Ný í stjórn Hörpu eru Gunnar Jónsson og Hrönn Greipsdóttir. Varamenn eru Jóhanna Gísladóttir og Arnfríður Sólrún Valdimarsdóttir.